மகுமுதிப்றாஹிம்லப்பை (19 நூ)

இந்நூல் முகியித்தீனாண்டகையவர்களின் இயற்கையும் செயற்கையுமாகிய நிகழ்ச்சிகளைக் கூறுவது. சிந்துப் பாடல்களோடு விருத்தம் முதலியனவும் கலந்து வந்துள்ளன; 104 செய்யுட்களை உடையது.

மகேசகுமார சர்மா (20 நூ)

ஆநந்தமடம்:- பங்கிம் சந்திரர் வங்க மொழியில் இயற்றிய நூலின் தமிழாக்கம்.

மங்கைபாகக் கவிராயர் (19 நூ)

வருக்கக் கோவை:

நத்தம் பெருநிலக்கிழார் முடிலிங்கைய நாயகர் குமாரர் சொக்கலிங்க நாயகர் மீது பாடப்பெற்றது. இந்நூல் பாடியமைக்காகப் பூசாரிப்பட்டி என்னும் ஊரை நன்கொடையாகப் பெற்றார். இந்நூல் இப்பொழுது கிடைக்கவில்லை.

மங்கைவாழ் கவி (19 நூ)

இவர் வீரபாண்டிய கட்டபொம்மன் காலத்தவர். வீரபாண்டிய கட்டபொம்மனுக்கும், கிழக்கிந்தியக் கம்பெனியார்க்கும் நிகழ்ந்த போர்களை நேரில் கண்டவர். அந்நிகழ்ச்சிகளைக் கும்மிப் பாடல்களாகப் பாடியுள்ளார். ஆங்கிலேயர்களுக்கு அஞ்சாமல் இக்கும்மிப் பாடல்களைப் பாடிச் சிறைத்தண்டனை பெற்றார்.