கணவனே தெய்வம் என்றுதொழும்-அன்னை
கஸ்தூரி பாயையும் கைதுசெய்தே
துணையாய் வைத்தனர் காந்தியுடன்-ஆனால்
துக்கம் நிகழ்ந்ததே அச்சிறையில்!
சிறையினில் வாழ்ந்து வருகையிலே-பெருந்
தியாகி கஸ்தூரி மறைந்தனராம்.
பொறுமை மிகவும் உடையவராம்-நல்ல
பொன்போல் குணங்கள் நிறைந்தவராம்.
காந்தி மடியில் தலையைவைத்தே-அன்னை
கஸ்தூரி பாயும் பிரிந்துவிட்டார்.
சாந்தி நிலவும் முகத்தினையே-கண்டு
தாங்கொணா வேதனை காந்தியுற்றார்.
விளையாடும் தோழியாய் உதவவந்தார்-நாட்டின்
விடுதலைப் போரிலும் உதவிநின்றார்.
எழுபத்தைந் தாவது வயதினிலும்-அவர்
இணையில்லாத் துணையாய் இருந்துவந்தார்.
கண்களைக் காக்கும் இமைகளைப்போல்-மகான்
காந்தியை என்றுமே காத்துவந்தார்.
அன்னை கஸ்தூரி மறைந்தசெய்தி-நாட்டை
அளவில்லாத் துயரினில் ஆழ்த்தியதே. | | |
|
|