சத்தியப் போரை காந்தியுமே
சாந்த முறையில் துவக்கினரே.
சத்தியம், உறுதி சேர்ந்ததனால்
‘சத்தியாக் கிரகம்’ என்றனரே.
சத்தியாக் கிரகம் செய்துவந்த
தலைவராம் காந்தியின் பின்னாலே,
பத்தா யிரத்துக்கும் மேலானோர்
படையெனத் திரண்டு வந்தனரே.
காந்தியைச் சர்க்கார் பிடித்தனரே;
கைதியாய்ச் சிறையில் அடைத்தனரே.
சேர்ந்து பலருமே காந்தியுடன்,
சிறையினில் வாடி வதங்கினரே.
இந்தியப் பெண்களும் அஞ்சவில்லை.
எதிர்த்துச் சிறைக்குமே சென்றனரே.
நந்தமிழ் நாட்டு வள்ளியம்மை
நல்லவ ளும்அதில் சேர்ந்தனளே.
நேரிய வழியில் போர்புரிந்தார்;
நீதியைக் காத்திடப் போர்புரிந்தார்.
சோர்வடை யாமலே போர்புரிந்தார்,
தூயவர் காந்தி தலைமையிலே.
| |  | | |
|
|