337. நூ: குழந்தைப் பிறப்பைக் குறிக்க, அம்மைபால்
        தந்தைக்குத் தோன்றிய தென்பதே தக்கது.

    பொ: குழந்தை பிறந்த செய்தியைக் குறிப்பதற்கு இத்தாயிடத்தில்
இத்தந்தைக்குத் தோன்றியது என்று கூறுவதே தக்கதாகும்.

    சா: கதிரவனுக்குக் குந்தியிடத்துத் தோன்றியவன் கன்னனாம்.

    இது உடலியல் முறையில் தமிழில் அமையும் அறிவியல் தொடரென்க.

    மற்று முன்னதும் இதுவும் இக்கால் ஈரிடத்தும் குவ்வுருபிட்டே
கூறப்பெறினும் குவ்வுருபு தன் பொருள் வலியிழந்தே வருதலின்
வழுவமைதியாகக் கொள்ளலாம்.

338. நூ: முகவரி முறைமையில் தமிழுக் கியைய
        ஊர்தெரு பெயரெனும் ஒழுங்கே நன்றாம்.

    பொ: முகவரி குறிக்கும் முறையில்-தமிழ்த் தொடர் அமைப்பிற்கேற்ப
ஊரை முன்னும் அடுத்துத் தெருவையும், பின்னர் பெயரையும் எழுதும்
வரிசை ஒழுங்கே தொடருக்கு நன்றாம்.

    இக்கால் வழக்கில் உள்ள முறைமைக்கு மாறாக - தலைகீழாக இதனைக்
கூறியது குழப்புவதற்கன்று.  ஆங்கிலத் தொடர் அமைப்பிற்கியைய வழங்கும்
இக்காலப் பெயர், தெரு, ஊர் முறையினும், தமிழ்த்தொடர் மரபுமுறை
அஞ்சலகப்பணிக்கும் பிறவற்றிற்கும் எளிதாதல் காண்க.  பிற்கூறும்
இரண்டும் தமிழ்த்தொடர்