379. நூ: பிறமொழி லவ்வொலி தமிழில் ளவ்வாம்
        ஆவிறு சொற்கள் ஐயீ றாகும்.

    பொ: வடமொழியில் உள்ள ஒரே லகர வொலிச் சொற்கள்
தமிழ்ப்படுங்கால், ளகர வொலியாகக் கருதப்பட்டுள்ளன. ஆகார இறுதிச்
சொற்கள் ஐகார இறுதியாக்கப்பெறும்.

    சா: தீபாவலி - தீபாவளி; கவலி - கவளி (கவடி); நாமாவலி-நாமாவளி;
மாலவிகா - மாளவிகை (கா.ம); மாலிகா - மாளிகை; தலம் - தளம்.

    இம்முறையில் Cycle - சைக்கிள் (மிதிவண்டி); பைபிள்; Apple-ஆப்பிள்
 எனப்படுதல் காண்க. வள்ளி - வல்லி எதிர்ப்போக்கு.

    சிவா - சிவை; உமா - உமை; உஷா - உசை; ஆஷா - ஆசை. கமலா
- கமலை (ஞானப்பிரகாசர்) விசயா - விசயை (சீ. சி.).

    பன்மொழிக்குரியன கூறி வருங்கால் வடமொழிக்குரியதைக்
கூறியமையின் மேலுஞ்சில கொள்க.

        அகரத்திற் காவும் இகரத்திற் கையும்
        உகரத்திற் கௌவும் இருவிற்-ககல்வரிய
        ஆருவும்; ஏயாம் இகரத்திற்கு-ஓவாகச்
        சேருமுக ரத்தின் திறம்! (நேமிநாதம்)

    அருகன் - ஆருகதன்: (பர்வதம் - பார்வதி) தாசரதி(இ)ராகவன்; சிவன
- சைவம் (விட்ணு - வைணவம்) மைதிலி வைதேகி; புத்தன் - பௌத்தன்;
(புருஷம் - பௌருஷம்) ருத்ரம் ரௌத்திரம்: இருடி - ஆரிடம்.

    என்றிவ் வண்ணம் அமையும் தத்திதப் பெயர்களும்,

    நர + இந்திரன் = நரேந்திரன்: அமர + ஈசன் = அமரேசன்: குல +
உத்துங்கன் = குலோத்துங்கன்: சூரிய + உதயம் = சூரியோதயம் என
முற்கூறிய உயிர் முறைப் புணர்ச்சி வருவனவும் உணர்க.