7, தொடரியல்

மூவகைத் தொடர்ப் பொருண்மை

381. நூ: எழுத்துப் பூக்களின் கொத்துச் சொற்களால்
       தொடுக்கும் மாலையாம் தொடர்தான் பொருள்தரு
       நோக்கால் நான்காய் நுவலப் படுமே;
       ஆக்கம் ஆங்கில நாரால் அமையும்.

    பொ: எழுத்துகளாய பூக்களை வரிசைச் சுருக்குக்கு வைக்கும்
கொத்தொத்த சொற்களால் அடுக்கித் தொடுக்கப்பட்ட மாலையாய தொடர்
என்பது, பொருள் புலப்படும் நோக்கத்திற்கியைய நான்கு வகையாக
நவிலப்படும். இத்தொடராக்க முறை ஆங்கில நாரால் அமைத்துக்
கொள்ளப்படும்.

    வி: எழுத்து, சொல், தொடர் முறையே பூ, கொத்து, மாலை என
உவமை கூறுதல் பண்டைய வழக்கே. சிதைவின்றிப் பிரிக்கப்படும் வேற்றுமை
நயம் பற்றியும் உவமை பொருந்தும். Sentence⁷ வாக்கியம் எனப் பிறமொழி
குறிக்கும் இது சொற்றடர், தொடரியம் எனக் கூறத்தகுவதேனும் தொடர்
எனப்பொதுவில் இந்நூலில் பயிலும்.

382. நூ: செய்தி யுரைக்கும் செப்புத் தொடரும்
        ஏவும் தன்மைக் கட்டளைத் தொடரும்,
        உணர்ச்சி காட்டும் உணர்ச்சித் தொடரும்,
        வினவிக் கேட்கும் வினாத்தொட ரும்அவை:

    பொ: அவை, செய்தியை இயல்பாய்க் கூறும் செப்புத் தொடரும், ஏவி
ஆணையிடும் கட்டளைத் தொடரும், உணர்ச்சி மிகுதியைக் காட்டும்
உணர்ச்சித் தொடரும், வினாவெழுப்பிக் கேட்கும் வினாத் தொடரும் என
நான்காம்.

    வி: செப்புத்தொடர், இயல்புரையோடு பிறமூன்று தொடர்கட்கு
அம்மூவுணர்வல்லாது கூறும் தொடர்களையெல்லாம் அடக்கும். ஏவல்
தொடரில் வியங்கோள் தொடர்களை முற்ற அடக்க முடியாது: பொருள்
நோக்கிக் கொள்க. உணர்ச்சியாவது மாந்தனின் மனவெழுச்சி வெளிப்படும்
சொல்லமைப்புத் தொடர்கள்; எண் வகை மெய்ப்பாடும் பொருந்தும்.