வி: பிறபொருள் தொடர்பின்றித் தன்னியல்பாய் நிகழும் இவ்வினைகள் எதையும் செய்யாமை அறிக.

        ‘ஒரு பொருள் தனியெனும் மனிதரைச் சிரிப்போம்!’

-(பாவேந்தர்)

    என்ற பாட்டடியை மனிதரைப் பார்த்துச் சிரிப்போம் எனச்
சொல்லியைபு கொண்டும் காட்டலாம். அன்றி, ஈண்டுக்கூறலுறும் நகை
எள்ளல் பற்றியதாகலின் ‘மனிதரை இகழ்வோம் எனப் பொருளியைபு
கொண்டும் கூறலாம்.

பொது

392. நூ: எழுவாய் பயனிலை செயப்படு பொருள்கள்
        நழுவி வருவதும் தொடர்பினா லுண்டே.

    பொ: தொடர்களில் எழுவாயும் பயனிலையும் செயப்படுபொருளும்
பொருள் தொடர்பால் நழுவியும் வருவது உண்டு.

    சா: ஒல்லும் வகையான் அறவினை ஓவாதே
செல்லும் வாயெல்லாம் செயல் (ஒருவன்)

    அறவுரைத் திருக்குறள் பெரிதும் எழுவாய் ஒளித்தே இயலும்.

    இங்கே வா; அதை வாங்கினேன். கதவைத் திற.

    முன்னிருப்பான் தொடர்பால் எழுவாய் மறைந்தது. இதனைத் தோன்றா எழுவாய் என்றும் மறைநிலை எழுவாய் என்றும் கூறுவர். பிறவுமன்ன.

    இவ்வாறு செயப்படு பொருளும் பயனிலையும் மறைந்து வருவது
பெரும்பாலும் விடுகதை, பழமொழி, (பொன்மொழி) மரபுத் தொடர்கள்
முதலியவற்றினே அமையும்.

மூவகை வினைமாற்றம்

393. நூ: செய்வினை செயப்படுவினையென, தன்வினை
        பிறவினை என்ன, உடன்பா டெதிர்மறை
        வினையென மூவகை வடிவுறும் வினையே.