400. நூ: எதிர்மறை இன்மை மறுப்பிவை இசைக்க
        இல்அல் ஆஇவை இடையில் அடையும்.

    பொ: எதிர்மறை வினை, இன்மையையும், மறுப்பினையும் காட்ட இல்,
அல், ஆ என்னும் இவை சொல்லினிடையில் வரும்.

    சா: அ.  வந்தான் - வந்திலன்; வருவேன் - வாரேன்.
        ஆ.  உண்டான் - உண்டிலன்; உண்ணலன்.
        இ.   உண்ணீர்; உண்ணோம்; உண்ணான்; உண்ணேன்.

    மூன்றிடை நிலைவருமியல்பை உறுப்பியலில் கூறினாம்.

401. நூ: வழக்கில் நிகழ்விறப் பில்லை யாலும்
        எதிர்வு மாட்டா வாலும் எதிர்மறை

    பொ: வழக்குரையில் நிகழ்கால இறந்தகால உடன்பாட்டு வினைகள்
‘இல்லை’ எனுஞ்சொல் சேர்ப்பதாலும், எதிர்கால உடன்பாட்டு வினை
‘மாட்டா’ என்னுஞ்சொல் சேர்ப்பதாலும் எதிர்மறையாகும்.

    சா: அவன் நேற்று வந்தான். அவன் நேற்று வரவில்லை.
        அவன் இன்று வருகிறான் - அவன் இன்று வரவில்லை.
        அவன் நாளை வருவான் - அவன் நாளை வரமாட்டான்.

    வி: நடக்கும் - நடக்காது; நடவும் - நடவாது என்பது போலன்றி
கிடைக்கும் - கிடைக்காது; கிடையாது - கிடைக்கும் என இச்சொல்
வருதலான் சிறார் ‘கிடையும்’ எனக்குதப்புவர்.

மூவகைத் தொடரமைப்பு

402. நூ: தொடர்ப்பொருள் நான்காய் அமையும் தொடர், சொல்
        தொடர்பை நோக்க மூன்றாய் முடியும்.

    பொ: தொடர்ப்படும் பொருளாற்றல் நான்கால் நான்காய்ப்
பிரித்துரைக்கப்பட்ட தொடர்கள், சொல்லமைப்புத் தொடர்பை
நோக்கமூன்றாய் முடிந்தியலும்.

403. நூ: அவையே,
        சிறுதொடர், கூட்டுக்கலப்புத் தொடர்கள்.

    பொ: பொருள் வெளிப்படை; சான்று பின்னுள: