வி: செய்யுட்குரியன எனக்கூறும் வலித்தல், மெலித்தல், நீட்டல்,
குறுக்கல் நான்கும் திரிதலிலும், விரித்தல்-தோன்றலிலும்.  தொகுத்தல்
கெடுதலிலும் அடங்கலின் வேறாவதில்லை.

194. நூ: மூன்றுமின் றாயின் இயல்புப் புணர்ச்சி.

    பொ: இயல்பற் புணர்ச்சிக்குரிய மூன்று பிறழ்வுகள் இல்லையாயின் அப்புணர்வு இயல்புப் புணர்ச்சியாம்.

195. நூ: ஒருசேர்க் கையினே இயல்பல் புணர்ச்சியுள்
       இரண்டும் மூன்றும் ஏற்பன அடையும்.

    பொ: ஒரு புணர்ச்சியின் கண்ணே இயல்பற் புணர்ச்சி மூன்றில்
ஒன்றேயன்றி இரண்டும் மூன்றும் சொல்லொலிக்கு ஏற்ப வந்தடைவுபடும்.

    சா: மண்ணாங்கட்டி; தென்னங்கீற்று.

196. நூ: புகைத்தொடர் வண்டிபோல் பொருந்தும் புணர்ச்சியில்
       இருப்பிரு தடம்போல் இருப்பன-தொடர்ப் பொருள்
       வேற்றுமை வழிஅல் வழியென இரண்டே

    பொ: தொடர்வண்டி போலப் பிணைந்து நீளும் புணர்ச்சியில், அதன்
அடிப்படையாம் இருப்புவழி இரட்டை போல இருப்பன.  தொடரின்
பொருள்பற்றி வகைப்படுத்தப்படும் வேற்றுமை வழி; அல்வழி என இரண்டே.
இவ்விருவழிப் பொருளறிவு இன்மையால் தான் இற்றை யார்க்குப்
புணர்ச்சி முறை புரியாததாயும் புதிராகவும் உள்ளது.

    விரி : புகை உமிழாது மின்னில் ஓடும் தொடர் வண்டிகளைப்
புகைவண்டி எனக்கூற வேண்டா எனினும் தெளிவு பற்றி
முன்னொட்டாக்கினோம்.  தொடர்வண்டி போன்ற தொடரில், பெட்டகம்
போலும் சொற்கள், முன்பின் எழுத்துகளால் பிணைந்திருப்பதனால்
தொடர்வண்டி ஒப்புக் கூறப்பட்டது.