::TVU::

அறுவகையிலக்கணம்

005

நூலின் தன்மையும் செய்யுள் தொகையும்

4.	தவராசர் புவிராசர் எனப்பெயர்மாத்
	திரம்புனைந்துஅத் தன்மை கொள்ளார்க்கு
	அவமானம் பெருக்கிஅந்தப் பெயர்க்குஉரிய
	குணம்கொள்வார்க்கு அழியாக் கீர்த்தி
	சிவலோகம் மட்டும்நிற்கச் செய்யவல்ல
	கவிராசர் செல்வம் ஆகும்
	நவநூல்¹ ஒன்று எழுநூற்றுஎண் பத்துஆறு
	சூத்திரத்தால் நவின்றிட் டேனே. (10)

நூலாசிரியர் தகுதி

5.	எண்ணரிய கவிப்புலவர்க்கு இனியது ஆம்இவ்
	விலக்கணநூல் பகுப்புஆறும் இயம்பும் முன்னம்
	வண்ணம்முதல் பலபாடல் கடலில், ஆற்றில்,
	வாவியில் செந் தீயில்இட்டேன்;² மற்றும் பன்னூல்
	விண்ணறிய மண்அறிய உலகத் தூடு
	விளங்கவைத்தேன் நலங்கருதி;³வேந்தர் போல்வார்
	தண்ணளிஇல் லாத்துறவோர் கெடுபாட் டுள்ளார்
	தன்மைஎல்லாம் அறிந்துஅறிந்தும் சலிப்புஉற் றேனே. (11)

இந்நூலாசிரியர் மொத்தம் நூறாயிரம் பாடல்களுக்குமேல் இயற்றினார். அவற்றுள் சற்றேறக் குறையப் பாதியை அவரே நீரிலும் நெருப்பிலும் இட்டு அழித்து விட்டார். அதுவே இங்குக் குறிக்கப் படுகிறது.