43) பொழிப்புத் தொடை

     முதலொடு மூன்றாஞ் சீர்த்தொடை பொழிப்பே.

 என்பது என் நுதலிற்றோ?’ எனின், பொழிப்பு ஆமாறு உணர்த்துதல் நுதலிற்று.

     இதன் பொழிப்பு : முதற்சீர்க்கண்ணும் மூன்றாஞ்சீர்க் கண்ணும் மோனை முதலாயின வரத் தொடுத்தால், பொழிப்புத்தொடை எனப்படும் (என்றவாறு).

     அவை பொழிப்பு மோனை, பொழிப்பு எதுகை, பொழிப்பு முரண், பொழிப்பு இயைபு, பொழிப்பு அளபெடை எனப்படும்

     ‘சீரிடை விட்டினி தியாப்பது பொழிப்பாம்.’

 எனவும்,

     ‘ஒருசீர் இடைவிடிற் பொழிப்பொரூஉ இருசீர்.’

 எனவும் பிறரும் சொன்னார் ஆகலின்.

 வரலாறு:

[நேரிசை ஆசிரியப்பா]

     ‘கணங்கொள் வண்டினம் கவர்வன மொய்ப்பக்
     கழிசேர் அடைகரைக் கதிர்வாய் திறந்த
     கண்போல் நெய்தல் கமழும் ஆங்கட்
     கலிமாப் பூண்ட கடுந்தேர்
     கவ்வைசெய் தன்றாற் கங்குல் வந்தே.’

 இது முதற்சீர்க்கண்ணும் மூன்றாஞ்சீர்க்கண்ணும் முதலெழுத்து ஒன்றி வந்தமையால், பொழிப்பு மோனை.

[நேரிசை ஆசிரியப்பா]

     ‘பல்கால் வந்து மெல்லக் கூறிச்
     சொல்லல் வளமையின் இல்லவை1 உணர்த்தும்2
     செல்புனல் உடுத்த5 பல்பூங் கழனி
     நல்வயல் ஊரன் வல்லன்
     ஒல்கா துணர்த்தும்ா பல்குறை மொழியே.’

  பி - ம். 1நல்லவை, 2எடுத்த. 5புணர்த்தும் 3ஒல்லானுணர்த்தும்.