இன்னது என்று - நல்வினையினது பயன் இத்தகையது என்று, நாளும் - நாடொறும், நெறி
நின்று - அந்நன்னெறிக்கண்ணே பிறழாது நின்று, நீர்மை மிக்கீர் - பெருமையில்
உயர்ந்தீராகிய நமரங்காள், நினைமின்மோ - நினையுங்கோள், மோ: முன்னிலை அசை,
(எ - று.)

     இத்தகைய பேரின்பங்களையும், அவையிற்றிற்குரிய பொருள்களையும் கூட்டுவிப்பது
நல்வினையே அன்றோ, அந் நல்வினையின் பெருமை இற்றென நாளும் சிந்தனை செய்து,
அந்நெறியிலேயே ஒழுகி இம்மை மறுமைகளைப் பெறுதல், நீர்மை மிக்கார்செயலாம் என்று
தேவர் செவியறிவுறுத்தார் என்க.

     இது, பயாபதி மன்னன் துறவு மேற்கொள்ளச் கருதிய செய்தியைக் கூறும் பகுதியாம்.
இதன்கண்:-

     செல்வப் பேற்றாலும் மக்கட் பேற்றாலும், பிற பேறுகளானும், பெரிதும் இன்புற்ற
பயாபதி வேந்தன் இத்தகைய சிறப்பைத் தனக்கு நல்கிய நல்வினையையும், தவத்தையும்
வியந்து அவற்றின் பெருமையைப் பாராட்டுதலும், அத்தகைய தவத்தை மேலும் ஆற்ற
வெண்ணி அமைச்சருடன் ஆராய்தலும், அருகக் கடவுளுக்கு விழாவெடுத்தலும், ஒரு பொன்
மண்டபத்திற் பயாபதி ஒரு துறவியைக் கண்டு வணங்குதலும், அத்துறவிபால்
அறங்கேட்டலும், அத்துறவி, நரகரும், விலங்கும், மக்களும். தேவரும் ஆகிய நால்வகைப்
பிறப்பியல்புயம், அவ்வப் பிறப்பில் உயிர்கள் எய்தும் இன்னலும் விரித்துரைத்தலும்,
வீட்டியல்பை நீயே அறிக எனலும், பயாபதி அத்துறவியை மீண்டும் வணங்கி வீட்டியல்பும்,
அதனை எய்தும் நெறியும், உரைத்தருள வேண்டலும், பிறவும் கூறப்படும்.