புனல் விளையாட்டு
201.	அருவிகள் ஆடுவார் சுனைகள் ஆடுவார் வெருவிவந் தகன்கரை மீதில் ஏறுவார் சருவிநின் றோடியப் புனலில் தாவுவார் மருமலர் கொய்குவார் மலைந்து மீள்குவார்.

     (இ - ள்.) அருவிகள் ஆடுவார் சுனைகள் ஆடுவார் - (மகளிரும்
ஆடவரும்) அருவிகளிலும் சுனைகளிலும் நீராடுவர், வெருவி வந்து அகன்
கரை மீதில் ஏறுவார் - பயந்து வந்து பரந்த கரைகளில் ஏறுவார்கள்,
சருவி நின்று ஓடி அப் புனலில் தாவுவார் - இருவரும் கிட்டி நின்று ஓடித்
தண்ணீரில் தாவுவார்கள், மரு மலர் கொய்குவார் - (கரையேறி வந்து)
மணம்பொருந்திய மலர் கொய்வார்கள், மலைந்து மீள்குவார் -
அம்மலர்களைச் சூடித் திரும்புவார்கள்.

     இவ்வாறு மலைமேல் பலரும் பலவாறு நீராடியும் மலர் கொய்து
சூடியும் விளையாடித் திரிந்தனர் என்க.
                                                    (97)

 

	மலைவளங் காணல்
202.	அருவியும் சுனைகளும் ஆடி நுண்மணல் மருவிய வண்டலும் மணந்த சோலையும் பருவரைக் குடுமியும் பளிக்குப் பாறையும் பொருவிலாப் புனங்களும் புகுந்து நோக்குவார்.

     (இ - ள்.) அருவியும் சுளைகளும் ஆடி - அருவிகளிலும்
சுனைகளிலும் நீராடிவிட்டு, நுண் மணல் மருவிய வண்டலும் - பொடி
மணல் பொருந்திய பொருக்குகளோடும் கூடிய மேட்டு நிலங்களிலும்,
பருவரைக் குடுமியும் - பெரிய மலைச்சிகரங்களிலும், பளிக்குப் பாறையும்
- பளிங்குப் பாறைகளிலும், பொருவிலாப் புனங்களும் - ஒப்பிலாத
தினைப்புனங்களிலும், புகுந்து நோக்குவார் - போய் இயற்கை அழகினைக்
காண்பர்;

     நீராடி மலர் பொய்து விளையாடிய மகளிரும் ஆடவரும் மணல்
மேட்டில் மலையுச்சியிலும் பூஞ்சோலையிலும் பளிங்குபோன்ற
கற்பாறைகளிலும் சிலர் பலராக அமர்ந்து களைப்பாறினர் என்க.
                                                    (98)

 

	தேரேறி மீண்டும் விரைந்து செல்லல்
203.	அன்றிருந் தணிவரைச் சாரல் வைகியே துன்றிருள் விடிந்தபின் சோதி வேலினான் சென்றிருஞ் சுடர்மணித் தேரிலேறியே வென்றிவெம் படையொடு விரைந்து போயினான்.

     (இ - ள்.) சோதி வேலினான் - ஒளிபொருந்திய வேல் ஏந்திய
அரிச்சந்திரன், அன்று அணி வரைச் சாரல் வைகி இருந்து - அன்றைக்கு
அழகிய மலைச்சாரலில் தங்கி இருந்து, துன்று இருள் விடிந்த பின் -