திணிந்த இருள் போய்ப் புலர்ந்தபின், சென்று இரும் சுடர் மணித் தேரில்
ஏறியே - எழுந்து போய்ப் பெரிய பேரொளி வீசும் அழகிய தேரில் ஏறி,
வென்றி வெம் படையொடு விரைந்து போயினான் - வெற்றி தரும்
கடுமையான படைகளோடு விரைந்து சென்றான் சந்திரமதியின் நகருக்கு.

     அரிச்சந்திரன் தன் படைகளோடு அன்று மலைச்சாரலில் தங்கி
இராப்போது போக்கி விடியலிற் றேரிலேறி விரைந்து மதிதயன் நகர்க்குச்
சென்றான் என்பது.
                                                    (99)

 

	தேர்ச் செலவு
204.	வேய்இருங் கானமும் வெற்பி னுச்சியும் மாயிரும் பொழில்களும் மடிந்து நுண்பொடி ஆயின விசும்பினை அடைந்த தூளியும் சேயிருஞ் சுடர்மணித் தேர்கள் செல்லவே.

     (இ - ள்.) சேய் இருஞ் சுடர் மணித் தேர்கள் செல்ல - மிக
உயர்ந்த பேரொளி வீசும் அழகிய தேர்கள் போகும்போது, வேய் இருங்
கானமும் - பெரிய மூங்கிற் காடும், வெற்பின் உச்சியும் - மலைச் சிகரமும்,
மா இரும் பொழில்களும் - பெரிய சோலைகளும், மடிந்து நுண் பொடி
ஆயின - அழிந்து சிறு துகளாயின, தூளியும் விசும்பினை அடைந்த -
ஆங்கு எழுந்த தூசிகளும் ஆகாயத்தை அடைந்தன.

     மாயிரும் - மா + இரும்; மாயிரு ஞாலம் என்புழிப்போல யகர
உடம்படுமெய் பெற்றது. தேர்கள் சென்ற வழிகளிலெழுந்த புழுதிகள்
வானத்தை யடைந்தன எனவே விரைந்து சென்றன தேர்கள் என்பது
குறிப்பு.
                                                   (100)

 

	பொற்றேர்ச் செலவின் அற்புதக் காட்சி
205.	செந்நிறப் பொலன்கதிர்த் தேரின் ஆழியும் தந்நிறம் அவ்வழி அனைத்தும் ஆதலால் பன்னிறக் கிரிகளும் பரந்த பாறையும் பொன்னிற மேருவே போற்பொ லிந்தவே.

     (இ - ள்.) செந்நிறப் பொலன் கதிர்த் தேரின் ஆழியும் தந்நிறம்
அவ்வழி அனைத்தும் ஆதலால் - (அரிச்சந்திரனுடைய) சிவந்தநிறமான
பொன்னிற ஒளிபொருந்திய தேரின் சக்கரங்களும் அச்சக்கரங்களின்
நிறமும் வழியெங்கும் ஒளிவீசுதலினால், பன்னிறக் கிரிகளும் பரந்த
பாறையும் பொன்னிற மேருவே போல் பொலிந்த - பல நிறமுள்ள
மலைகளும் பெரிய பாறைகளும் பொன்னிறம் பொருந்திய மாமேரு
மலைபோல் விளங்கின.

     செந்நிறம் : பண்புத்தொகை; செம்மை + நிறம்; ஏது அணி. ஏகாரம்
: ஈற்றசை. அரிச்சந்திரன் ஏறிய தேர் பொன்னாற் செய்யப்பட்ட தேர்
ஆதலால் அதன் சக்கரங்கள் பதிந்தவிடமும் அண்மையில் உள்ள
மலையும் பாறையும் பொன்னிறமாகவே தோன்றின என்பது. சக்கரங்கள்
பல ஆதலால் 'தந்நிறம்'