பாலைவனச் சிறப்பு         அறுசீர்ச் சந்த விருத்தம்
208.	என்றும்அம ரர்க்குவினை யின்றிஅரன் முப்புரம்    எரித்த கனலும் வென்றிமத னைப்பொடி படத்திரு நுதற்கணை    விழித்த கனலும் வன்றிரை எறிந்தெழு கடற்குள்நடு வைத்தவட    வைக்கன லும்உற் றொன்றுபட வந்துகுடி கொண்டவண் உறைந்தன    வுருப்பம் எழவே.

     (இ - ள்.) என்றும் அமரர்க்கு வினை இன்றி அரன் முப்புரம்
எரித்த கனலும் - இன எந்நாளும் தேவர்க்குத் துன்பம் நேராதபடி சிவன்
திரிபுரத்தை எரித்த தீயும், வென்றி மதனைப் பொடி படத் திருநுதற் கணை
விழித்த கனலும் - வெற்றியையுடைய மன்மதன் பொடியாகும்படி அழகிய
நெற்றிக்கண்ணைத் திறந்து நோக்கியதால் விளைந்த தீயும், வன் திரை
எறிந்து எழு கடற்குள் - வலிய அலைவீசி எறிகின்ற கடலில், நடு வைத்த
வடவைக் கனலும் - நடுவே வைக்கப் பட்டிருக்கும் வடவை முகத் தீயும்,
உற்று ஒன்றுபடவந்து - (ஆகிய முத்தீயும்) ஒன்றாய்ச் சேர்ந்து வந்து, குடி
கொண்டு உருப்பம் எழு அவண் உறைந்தன - நிலைபெற்றிருந்து வெப்பம்
வீசும்படி அங்குத் தங்கின.

     அமரர் - மரணமில்லாதவர் : காரணப்பெயர், உம்மைகள்
எண்ணுப்பொருளன. ஏகாரம் : ஈற்றசை. பாலைவனத்தின் வெப்பத்தை
அம் மூன்று வகையான நெருப்பும் ஒன்றாகக் கூடியுறைந்தனபோல்
இருந்தது எனச் சிறப்பித்தார்.
                                                   (104)

 

209.	கானமுழு தும்தெறு கனற்றிரளில் வெந்தெழு    கதிர்ச்சுட ரின்வெந் தூனமுற வற்றிஉர கத்தலை வெடிப்பவதன்    உச்சி வழிபோய் வானள வெழுந்துபுவி மீதுவிழு கின்றமணி    வந்த பகல்வான் மீனம்விழு கின்றபடி யாமென விளங்கின    வெளிப் புறமெலாம்.

     (இ - ள்.) கானம் முழுதும் தெறு கனல் திரளில் வெந்து எழுகதிர்ச்
சுடரின் வெந்து - காடு முழுவதையும் எரிக்கின்ற தீயின்
தொகுதியைப்போல வெந்து எழுகின்ற சூரியனுடைய ஒளி வெயிலால்
கருகி, ஊனமுற வற்றி - பழுதாகும்படி வற்றிப்போன, உரகத் தலை
வெடிப்ப - பாம்பின் தலை வெடிப்ப, அதன் உச்சி வழி போய் வான்
அளவு எழுந்து - அதன் உச்சி வழியாகப் போய் வானம் வரை உயர்ந்து,
புவிமீது வந்து விழுகின்ற மணி -