(இ - ள்.) வெங் கரி உரித்து இடை புனைந்தவள் சலம் கலை
விளங்கும் சடிலச் சங்கரி - கொடிய யானையை உரித்து அதன் தோலை
அரையில் உடுத்தியவளும், கங்கையும் சந்திரனும் விளங்குகின்ற
சடையையுடையவளும் ஆகிய சங்கரி, திரிசூலதரி - மூவிலைச் சூலத்தைத்
தரித்தவளும், தாருக விநாசனி - தாருகாசுரனை அழித்தவளும், சவுந்தரி -
இயற்கை அழகு வாய்ந்தவளும், செழும் பொங்கு அரி மணி பரிவுரத் திருப்
பதத்தினள் - பேரொளி வீசும் பச்சைக்கற் பரல் அமைந்த சிலம்பணிந்த
திருவடிகளை யுடையவளும், பொரும்பன தனத்து - மலைபோன்ற
தனங்களை யுடையவளுமாகிய, எங்கள் தனி நாயகி - எங்கள் ஒப்பற்ற
குலத்தெய்வமாகிய உமாதேவியாகிய காளி, இருந்த சமயத்து இயல்பு
எடுத்து உரை செய்வாம் - அங்கு எழுந்தருளியிருந்த இலக்கணத்தை
எடுத்து மொழிவாம்.

     சிவன் செய்யும் செயல்கள் எல்லாம் சத்தி மூலமாகச் செய்தலினாலும்,
சிவனது இடப்பாகத்தில் சத்தி யிருத்தலினாலும் சிவனுக்குரிய செயல்களும்
சிவனது உருவத்தில் தரிப்பனவும் சத்திக்கும் உரியன.
                                                    (112)

 

	அரவப்பணி மணியொளிக் காட்சி
217.	எறித்தசெ ழுமுச்சுட ருமொத்தொரு தலத்திடை    எழுந்த தெனவே தெறித்திரு புறக்கடை சிவத்திடை கறுத்தகண்    மிகச்சு ழலவே சிறுத்தவி டையிற்கர தலத்தின்மு டியிற்றிகழ்    செறித்த அரவப் பொறிக்கண பணத்தலை மணிச்சுடி கையிற்கதிர்கள்    பொங்கி விழவே.

     (இ - ள்.) எறித்த செழு முச்சுடரும் ஒத்து ஒரு தலத்திடை
எழுந்தது என - ஒளிநிரம்பிய ஞாயிறு திங்கள் தீயாகிய மூன்று தீப்
பிழம்புகளும் ஒப்ப ஒரே இடத்தில் எழுந்ததுபோல, செறித்து இரு
புறக்கடை சிவந்து செறிந்து விளங்கி இருபக்கங்களிலும் கடைக் கண்களில்
சிவந்து, இடை கறுத்த கண் - நடுவில் கறுப்பான கண்கள், மிகச் சுழல -
மிகவும் சுழன்றுகொண்டிருக்க, சிறுத்த இடையில் கரதலத்தில் முடியில் -
சிறிய