மாலைகளுடனே நெற்றிப்பட்டமும், அணி தோள் வளை - அழகிய வாகு
வலயங்களும், செழும் பாடகம் - செழுமையான பாடகங்களும் எழில்
பரிபுரம் கழல் சதங்கைகள் உடன் - அழகிய சிலம்புகள் கழல்கள்
சதங்கைகளுடனே, நீடு எழில் பதக்கம் மதாணிகள் அலைந்து திசை
எங்கும் ஒளிநின்று அடர - அழகு மிகுந்த பதக்கத்தாலாகிய மார்பு
அணிகள் நாலாபக்கங்களிலும் அசைந்து நிலைபெற்ற ஒளி பரப்ப;

     எங்கும் : உம்மை முற்றும்மை: பாரிய : பருமை என்னும்
பண்படியாகப் பிறந்த பெயரெச்சம். பரிபுரம் - சிலம்பு என்னும் காலணி.
ஏகாரம் : ஈற்றசை. இச்செய்யுள் குளகம்.
                                                    (118)

 

	கலை மேகலையின் காட்சி
223.	நித்தில நிரைத்துவயி ரத்தின மழுத்திமுழு    நீல நிறுவிப் பத்திபட ஒப்பரிய பச்சைவிர விப்பதும    ராக மளவிச் சித்திர மியற்றிய மணிக்கலையும் அப்பரிசு    செய்த கிரணத் துத்தரிய மும்தொடையு முற்றுநில வும்வெயிலும்    ஒக்க விழவே.

     (இ - ள்.) நித்திலம் நிரைத்து வயிரத்து இனம் அழுத்தி முழு நிலம்
நிறுவிப் பத்தி பட ஒப்பு அரிய பச்சை விரவிப் பதுமராகம் அளவி -
முத்துகளை வரிசையாகப் பகித்து வயிர இன மணிகளைப் பதித்துக்
கலப்பில்லாத நன்னீலமணிகளை நிலையாகப் பதித்துப் பத்தி பத்தியாக
இணையற்ற பச்சை மணிகளைக் கலந்து பதுமராகங்களைச் சேர்த்து,
சித்திரம் இயற்றிய மணிக் கலையும் - சித்திரப் பேட்டுகள் அமைத்த
அழகிய ஆடைகளும், அப்பரிசு செய்த கிரணத்து உத்தரியமும் -
அத்தன்மையாகவே அமைக்கப்பெற்ற ஒளிபொருந்திய மேல் ஆடையும்,
தொடையும் - மாலைகளும், நிலவும் வெயிலும் ஒக்க விழ - நிலவு ஒளியும்
சூரியன் ஒளியும்போல விழவும்;

     வெண்ணிலா ஒளி வெண்ணிற ஆடைகளுக்கும் சூரியன் ஒளி
அவைகளில் அமைத்த மணியொளிக்கும் முறையே உவமையாயினமையின்
உவமை அணி. இச்செய்யுள் குளகம். ஏகாரம் : ஈற்றசை.
                                                    (119)

 

	பூதகணங்கள் புரியுஞ் செயல்கள்
224.	காவல்முறை நிற்பஒரு கோடியுள கற்பனைகள்    கற்று வழுவா தேவலிடை நிற்பஒரு கோடியுள் கூடியவி    டாகினி கண்மேல்