'அம்பும்' என்பது உபலக்கணத்தால் பெறப்பட்டது. 'பொன் ஆரும்
களப முலை' என்பதற்குப் பொன்போன்ற தேமற்படர்ந்த சந்தனம் பூசிய
கொங்கை எனவும் பொருள் கூறலாம். அரிச்சந்திரன் மனத்தில்
நினைத்தவளவில் வெளிப்பட்டாள் என விரைவு கூறினர்.
                                                   (127)

 

	கற்றேர் பொற்றேராய காரணம் வினவல்
232.	மாதங்கி வந்திடலும் மலர்க்கரங்கள் முடிமீது    வைத்துச் செம்பொற் பாதங்கள் மிசைவீழ்ந்து பணிந்தெனது தவப்பயன்றான்    பலித்த தென்னாப் பூதங்கள் வினையாடும் திருவாயிற் கற்றேர்போய்ப்    பொற்றே ரான தீதென்று நீஅருள்வாய் எனக்கேட்கக் குமரிஎடுத்    தியம்பல் உற்றான்.

     (இ - ள்.) மாதங்கி வந்திடலும் - காளிதேவி தோன்றியவுடனே,
மலர்க்கரங்கள் முடிமீது வைத்து, தாமரை மலர்போன்ற கைகளைத்
தலையில் வைத்து, செம்பொன் பாதங்கள் மிசை விழுந்து - காளிதேவியின்
சிவந்த திருவடிகளில் விழுந்து வணங்கி, எனது தவப்பயன்தான் பலித்தது
என்னா - நான் செய்த தவத்தின் பயன் இன்றே கிட்டியது என்று
நினைத்து, பூதங்கள் விளையாடும் திருவாயில் கல் தேர் போய்ப் பொன்
தேர் ஆனது - பூதங்கள் விளையாடுகின்ற திருவாயிலிலுள்ள
கல்லாலாக்கப்பட்ட தேர் முழுதும் மாறிப் பொற்றேர் ஆனதற்குக் காரணம்
ஈது என்று, நீ அருள்வாய் எனக் கேட்க - இதுதான் என்று நீ திருவருள்
புரிந்து கூறவேண்டும் என்று கேட்க, குமரி எடுத்து இயம்பல் உற்றாள் -
கன்னியாகிய காளிதேவி விளக்கிச் சொல்லத் தொடங்கினாள்.

     மலர்க்கரங்கள் : உவமைத்தொகை; என்னா : செய்யா என்னும்
வாய்பாட்டு வினையெச்சம்; உற்றாள் - உறு : பகுதி. ஒற்று இறந்த காலங்
காட்டியது. செம்பொன் : பண்புத்தொகை. நல்ல பொன் - உயர்ந்த பொன்.
பொற்பாதங்கள் : உவமைத்தொகை.
                                                   (128)

 

	காளி காரணங் கூறுதல்
233.	உவராழி மண்ணாசை ஒழித்தகலும் அடல்வருணன்    உலகில் யாரும் கவராது பொற்றேரைக் கற்றேரா கச்சபித்துக்    கண்முன் காட்டி எவரானும் இதுநோக்கின் இவ்வுருப்போய்ப் பண்டையுரு    எய்தும் ஆகில் அவராகும் இதற்குதியோ ரவர்தமக்கே கொடுப்பதென    அளித்துப் போனான்.