246.	முன்னரோர் முனிவரன் மொழிந்த சாபத்தால் பன்னகத் தரிதுயில் பாற்க டற்கணே பொன்நகர் வளனெலாம் புக்க தாமென மன்னவன் கங்கையில் வந்திறங் கினான்.

     (இ - ள்.) முன்னர் ஓர் முனிவரன் மொழிந்த சாபத்தால் - முற்
காலத்தில் ஒரு துருவாச மாமுனிவர் இட்ட சாபத்தினால், பன்னகத்து அரி
துயில் பால் கடல் கண் - பாம்பணையில் திருமால் யோகத் துயில் புரிந்த
திருப்பாற்கடலில், பொன் நகர் வளன் எலாம் புக்கதாம் என -
தேவருலகத்திலுள்ள செல்வம் முழுதும் போய்ப் புகுந்தது போல,
மன்னவன் கங்கையில் வந்து இறங்கினான் - அரிச்சந்திரப் பேரரசன்
கங்கைக்கரையில் வந்து இறங்கினான்.

     முன்னர் - அர் : பகுதிப்பொருள் விகுதி; கணே, எலாம் :
தொகுத்தல் : வளன் - போலி. கங்கை : ஆகுபெயர். பொன்னுலகிலுள்ள
செல்வமெல்லாம் திருப்பாற்கடலிற் கவிழ்ந்ததுபோல அரிச்சந்திரன்
படையுடன் கங்கையுளிறங்கிய தோற்றமிருந்தது எனக் கொள்க. இந்திரன்
பெருஞ்செல்வமெல்லாம் இங்கு வந்ததுபோலத் தோன்றியது என்பது
கருத்து.
                                                   (142)

 

	கங்கைச் சிறப்பு
247.	மின்னிற நுண்ணிடை மின்ன னார்முலைச் செந்நிறச் சுண்ணமும் திமிர்ந்த சாந்தமும் நன்னிறக் குங்குமச் சுவடு நண்ணிவான் வின்னிறம் ஒத்தது விமல நீத்தமே.

     (இ - ள்.) விமல நீத்தம் - அழுக்கற்ற கங்கை நீரானது. மின் நிற
நுண் இடை மின் அனார் முலைச் செந்நிறச் சுண்ணமும் - மின்னலைப்
போன்ற நிறமும் நுட்பம் பொருந்திய இடையையுமுடைய மின் கொடி
போன்ற பெண்களின் கொங்கையிற் பூசப்பெற்ற சிவந்த நிறமுள்ள
வாசனைப் பொடியும், திமிர்ந்த சாந்தமும் - நிறைந்த சந்தனமும், நல் நிறக்
குங்குமச் சுவடும் நண்ணி - நல்ல நிறமுள்ள குங்குமச் சேறும் பொருந்தி,
வான வில் நிறம் ஒத்தது - வானவில்லின் நிறத்தை ஒத்திருந்தது.

     உம்மைகள் எண்ணும்மை. ஏகாரம் : ஈற்றசை. வானவில்லின் நிறம்
பலவகை நிறங்களும் கலந்த நிறம். அதுபோலக் கங்கை வெண்மை
நிறமாகிப் பலவகை நிறமாகக் காணப்பட்டது, சுண்ணம் சாந்தம் குங்குமம்
இவைகள் கலந்ததால்.
                                                   (143)

 

	கங்கை நீராடல்
248.	வரைசெறி வேழமும் மாவின் கூட்டமும் விரைசெறி தார்ப்புய வேந்தர் மக்களும் பிரசமா மலர்க்குழல் பேதை மாதரும் அரசனும் கங்கைநீ ராடி ஏறினார்.