குடித்து, எழுந்து ஓங்கிய காளகூடம் விண் பால் பரந்தால் என
எழுந்தது - பாற்கடலைக் கடைந்தபோது தோன்றி உயர்ந்து ஓங்கிய
ஆலகாலவிடம் ஆகாயமெங்கும் பரவியதுபோல எழுந்தது.

     வெண்ணிற மேகத்திற்குப் பாற்கடல் அமுதம் உவமையாகவும் கருநிற
மேகத்திற்கு அதிற்றோன்றிய விடம் உவமையாகவும் கொள்க. தண்மை +
பால் = தட்பால், "ஈறுபோதல்" "ணன வல்லினம் வரட்டறவும்"
உள் + பால் = உட்பால். "லள வேற்றுமையிற் றடவும்." அன்று, ஏ :
அசைகள். பாற்கடலிற்றோன்றிய அமுதம் கருங்கடலுக்குள் தானே வந்து
புகுவதற்கு உரிமை தோன்ற, 'நட்பாற் புகுந்தால் என' என்றார்.
கருங்கடலுக்கும் பாற்கடலுக்கும் தொடர்பிருப்பதனால் அது தானே
கருங்கடலுக்குள் நுழைந்தது என்று கூறினார்.
                                                     (2)

     (இ - ள்.) மா முகில் கூட்டம் - பெரிய மேகக் கூட்டம், அடியும்
முடியும் தெரியாது அண்டம் எங்கும் இருண்டு - கீழும் மேலும்
தெரிந்துகொள்ள முடியாதபடி உலகம் எல்லாம் இருண்டு, கொடியும்
குடையும் என ஈண்டி - வானத்தில் கொடியுருவம் போலவும் குடை
உருவம் போலவும் தோன்றும்படி ஒன்றுகூடி, படியும் விசும்பும் பகைத்தால்
என - மண்ணும் விண்ணும் பகைத்துப் போர்புரிந்தது போல, பார வில்
கோத்து - பளுவான இந்திரவில் பூட்டி, இடியும் துளியும் கணையாய்ப்
பெரிது எய்தது - இடியோசையாகிய போர் முழக்கத்தோடு
மழைத்துளிகளாகிய அம்புகளை எய்தது.

     முகிற்கூட்டம் : எழுவாய்; எய்தது : பயனிலை. மேகக்கூட்டத்தைக்
கொடி குடையகளாகவும், மண்ணையும் விண்ணையும் எதிர்த்து நின்று
போர் புரியும் பகைவராகவும், இந்திர வில்லை வில்லாகவும் மழைத்
துளிகளை அம்புகளாகவும், உருவகப்படுத்தி இடியைப்போர் முழக்கமாக
உருவகப்படுத்தாமையின் ஏகதேச உருவக அணி. அடியும் முடியும், படியும்
விசும்பும் : முரண்தொடைகள். அன்று, ஏ : அசை; மாமுகில் :
உரிச்சொற்றொடர்.
                                                     (3)

	மழைத்துளி விழுஞ் சிறப்பு
18.	மீனம் திகழ்வே லையிற்றோன்றிய தென்ன விண்ணோர் தானம் திகழ்தாத் திரியைப்பெருந் தாழிஆக்கி வானம் தனைசெய் அரிவட்டகை ஆக்கி விட்ட பானம் தனைஒத்து விழுந்தது மாரி பம்பல்.