பங்கம் - சேறு. சேற்றிலே தோன்றிய தாமரைக்குப் பங்கயம் என்பது
காரணப் பெயர். மங்கை : ஆகுபெயர். சூரியன் தாமரையை
மலரவைத்தலின் பங்கயச் சகாயனானான். முன்னம் : முனம் எனத்
தொகுத்தல் ஆயிற்று. மாநகர் : உரிச்சொற்றொடர். இல்லா - இலா:
தொகுத்தல் ஆயிற்று. இது ஈறுகெட்ட எதிர்மறைப் பெயரெச்சம்.

     ஏகாரம் : ஈற்றசை. கலித்த : பலவின்பால் வினைமுற்று.
                                                   (152)

 

	கூட மாட கோபுரச் சிறப்பு
257.	விண்டலத்து மாதர்இந்த மேதினிக் கிறங்கவும் மண்டலத்து மாதர்வானின் வண்மைசென்று காணவும் கொண்டல்விண் டெழச்சமைத்த கூடமாட கோபுரம் அண்டரண்டம் ஊடறுத்த தற்குமப்பு றத்தவே.

     (இ - ள்.) விண் தலத்து மாதர் இந்த மேதினிக்கு இறங்கவும் -
வானுலகத்துப் பெண்கள் இந்தப் பூமியிலே வந்து இறங்கவும், மண் தலத்து
மாதர் வானின் வண்மை சென்று காணவும் . பூவுலகப் பெண்கள்
தேவருலகத்தின் செழிப்பை அங்குப் போய்ப் பார்க்கவும், கொண்டல்
விண்டு எழச் சமைத்த கூடம் மாடம் கோபுரம் - மேக மண்டலத்தைப்
பிளந்து எழும்படி உயரமாக அமைக்கப்பெற்ற கூடங்களும் மாடங்களும்
கோபுரங்களும், அண்டர் அண்டம் ஊடு அறுத்து - அடுக்காகவுள்ள
அண்டங்களையெல்லாம் ஊடறுத்து உயர்ந்து, அதற்கும் அப்புறத்த -
அதற்குமேலும் அப்பாற்பட்டுச் சென்று நின்றன.

     ஏகாரம் : ஈற்றசை; விண் + தலம் - விண்டலம்; மண் + தலம் -
மண்டலம்; கூட, மாட கோபுரம் : உம்மைத்தொகை; உயர்வுநவிற்சியணி.
உயர்ந்து அமைவதற்குக் கவி தான் ஒரு காரணத்தைக் கற்பித் துக்கூறலின்
தற்குறிப்பேற்ற அணியுமாம்.
                                                   (153)

 

	மாளிகைச் சிறப்பு
258.	நெடியமாட நேத்திரத்தின் நிரைவகுத்த சாளரத் திடையின்மாதர் எழில்மு கங்கள் எங்கணும்வி ளங்குதல் கடிகொள்வெற்பின் மீதெழுந்த கதிர்தனைத் துளைத்ததின் நடுஉதித்த நளிர்மதிக்கு நிகரெனப்பொ லிந்தவெ.

     (இ - ள்.) நெடிய மாடம் நேத்திரத்தின் நிரை வகுத்த சாளரத்து
இடையின் மாதர் எழில் முகங்கள் எங்கணும் விளங்குதல் - நீண்ட
மாளிகைகளின் கண் போன்ற வரிசையாக அமைக்கப்பெற்ற சன்னல்களின்
வழியே, பெண்களின் அழகிய முகங்கள் எங்கும் விளங்கித்
தோன்றுதலானது, கடி கொள் வெற்பின் மீது எழுந்த - ஒளியுள்ள
உதயகிரியின்மேலெழுந்த, கதிர் தனைத் துளைத்து அதன் நடு உதித்த -
சூரியனைத் துளைத்துக்கொண்டு அதன் நடுவிலே தோன்றின. நளிர்
மதிக்கு நிகர் எனப் பொலிந்த - குளிர்ந்த சந்திரனுக்கு ஒப்பாக விளங்கின.