சந்திரதயன் அரிச்சந்திரனை அன்புடன் வரவேற்றல்
261.	தருஇருந்த கரனிருந்த சபைகொள்மண்ட பத்திலே மருகன்வந்து புகுதலும்தன் மனமகிழ்ந்து மதிதயன் அருகிருந்த அரசரோடும் ஆதனத்தி ருந்துபோய் இருகரங்க ளிறுகநண்பின் எதிர்நடந்து தழுவினான்.

     (இ - ள்.) தரு இருந்த கரன் - கற்பகத தருவின் செயல் குடி
கொண்டிருந்த கைகளையுடைய சந்திரதயன், இருந்த சபை கொள்
மண்டபத்தில் - வீற்றிருந்த சபை கூடியிருந்த கொலுமண்டபத்தில், மருகன்
வந்து புகுதலும் - மருமகனாகிய அரிச்சந்திர மன்னன் வந்து
புகுந்தவுடனே, மகிழ்ந்து - மனம் மகிழ்ந்து, ஆதனத்திருந்து அருகிருந்த
அரசரோடும் போய் - சிம்மாசனத்திலிருந்து எழுந்து பக்கத்தில்
அமர்ந்திருந்த அரசர்களோடும் போய், நண்பின் எதிர் நடந்து - நட்போடு
நடந்து எதிர்கொண்டழைத்து, இரு கரங்கள் இறுகத் தழுவினான் -
இரண்டு கைகளாலும் இறுக்கமாகக் கட்டித் தழுவினான்.

     எழுந்து என்பது அவாய்நிலையால் வந்தது. இரு கரங்கள் :
மூன்றனுருபும் முற்றும்மையும் தொக்கன. கற்பகத்தரு தன்னை
யடைந்தோர்க்கு அவர் வேண்டிய பொருளைத் தன்னிடத்து உடனே
ஆக்கிக் கொடுப்பதுபோலச் சந்திரதயனும் வேண்டிய பொருள்களைக்
கொடுப்பன் என்பதாம். தரு வென்பது தருவின் செயலுக்காதலின்
ஆகுபெயர்.
                                                   (157)

 

	சந்திரதயன் மனமகிழ்ச்சி
262.	முனிவருக்கும் அரசருக்கும் முழுதும்ஆத னம்கொடுத் தினிதுகூறி அவ்வவணி யாவரும்இ ருந்தபின் அனிகவேலை மதிதயன்ற னாதனத் திருந்துளம் கனியவாச முகம்மலர்ந்து கண்களிப்ப நோக்கினான்.

     (இ - ள்.) முனிவருக்கும் அரசருக்கும் முழுதும் ஆதனம்
கொடுத்து - அரிச்சந்திரனோடு வந்த முனிவர்களுக்கும் அரசர்களுக்கும்
எல்லோரும் இருக்கும்படி இருக்கை அளித்து, இனிது கூறி - இனிய
நல்வரவு மொழிகளைச் சொல்லி, அவ்வவண் யாவரும் இருந்த பின்னர்
- அவரவர்க்குரிய இடங்களில் எல்லோரும் அமர்ந்தபின், அனிக வேலை
மதிதயன் - படைக் கடலைக்கொண்ட சந்திரதயன், தன் ஆதனத்து
இருந்து உளம் கனிய வாச முகம் மலர்ந்து கண் களிப்ப நோக்கினான் -
தன்னுடைய சிங்காதனத்தில் இருந்து மனம் உருகத் திருவாழ்கின்ற முகம்
மகிழ்ச்சியால் மலர்ந்து கண்கள் குளிர்ந்து விளங்க அரிச்சந்திரனைப்
பார்த்தான்.

     உம்மைகள் முன்னுள்ளன எண்ணுப்பொருளன. பின்னையது
முற்றும்மை. அவண் + அவண் = அவ்வவண்; அவண் + யாவர் =
அவணியாவர் "தன்னொழி மெய்ம்முன் யவ்வரின், இகரம் துன்னும் என்று
துணிநரும் உளரே" என்ற விதியின்படி இகரம் வந்தது. அனிக வேலை -
முன்பின்னாகத்தொக்க உவமத்தொகை.
                                                   (158)