(இ - ள்.) வெற்றி மன்னனும் - வெற்றி அரசனாகிய சந்திரதயனும்
மணம் விரும்பி வந்த மன்னரும் - திருமணத்தை மகிழ்ச்சியோடு காணவந்த
மன்னர்களும், சுற்றி நின்ற மாதரும் - சுற்றி நின்ற பெண்களும், துலங்கு
தார் அமைச்சரும் - விளங்குகின்ற மாலையணிந்த மந்திரிகளும், பற்றி
உற்று எதிர்ந்த கண்கள் பசுமரத்தில் ஆணிபோல் சற்று இமைக்கலாது -
விருப்புற்றுப் பொருந்தி நேர் எதிராகப் பார்த்த கண்களைப் பச்சைமரத்தில்
அறையப்பெற்ற ஆணிபோல் பதியவைத்துச் சிறிதும் இமைகொட்டாமல்,
வள்ளல் தன் முகத்தை நோக்கினார் - அரிச்சந்திர வள்ளலுடைய
முகத்தைப் பார்த்தவண்ணமாயிருந்தார்கள்.

     தன் : சாரியை; உவமையணி, பசுமரத்திலாணிபோல் என உவமை
வந்ததால். ஆண்மையும் எழிலும் அமைந்த சிறந்த மன்னன்
அரிச்சந்திரனாதலால் யாவரும் அவனையே நோக்கினர் என்பது குறிப்பு.
                                                   (159)

 

	அறுசீர்க் கழிநெடிலடி ஆசிரிய விருத்தம்        அரிச்சந்திரனை யாவரும் வியத்தல்
264.	மாந்தரும் மாத ராரும் மன்னரும் அமைச்சர் தாமும் ஏந்தலைப் பார்த்த கண்கள் இமைத்திலர் பிறிது நோக்கார் மாந்தளி ரனைய மேனி வாணுதல் இரதி என்பாள் காந்தனும் அவனே வேறு காமனும் உளனோ என்பார்.

     (இ - ள்.) மாந்தரும் மாதராரும் மன்னரும் அமைச்சர் தாமும்
ஏந்தலைப் பார்த்த கண்கள் இமைத்திலர் பிறிது நோக்கார் - ஆடவரும்
பெண்களும் அரசரும் அமைச்சரும் அரிச்சந்திரனைப் பார்த்த கண்கள்
இமைகொட்டாதவராய் மற்றொன்றையம் பாராமல் இருந்தனர், மாந் தளிர்
அனைய மேனி வாள் நுதல் இரதி என்பாள் - மாந்தளிர்போன்ற
மேனியையும் ஒளிபொருந்திய நெற்றியையுமுடைய இரதி போன்றவளான
சந்திரமதிக்கு, காந்தனும் இவனே வேறு காமனும் உளனோ என்பார் -
நாயகனும் இவனே இவனையன்றி மன்மதனும் இருக்கின்றானோ என்றும்
சிந்தித்தனர்.

     ஓகாரம் : எதிர்மறை; காந்தனும் காமனும் - உம்மைகள் உயர்வு
சிறப்பு; ஏனைய உம்மைகள் எண்ணுப்பொருளன. இமைத்திலர், நோக்கார்
: முற்றெச்சங்கள்; சந்திரமதியை இரதி என்றதற்கேற்ப அரிச்சந்திரனைக்
காமன் என்றனர். ஏந்தல் : ஆண்பால் சிறப்புப்பெயர், பிறிது : அஃறிணை
ஒன்றன்பாற்பெயர்.
                                                   (160)