(இ - ள்.) ஆரம், குளவஞ்சி, அசோகு, பலாசம், தேவதாரம், மகிழ்,
காடு, சண்பகம், சாதிலிங்கம், கோங்கு, சுரபுன்னை, கடம்பு, கச்சூரம்,
மூங்கில், கர்ப்பூரம், அரசு ஆகிய மரங்கள் கொம்புகளோடு (அலைகள்)
புரட்டி உருட்டிச் செல்ல, சரயுநதி வேகமாக ஓடியது. அன்று, ஏ :
அசைகள்.

     பெருவெள்ளம் மலையினின்று புறப்பட்டதால் அங்குள்ள மரங்களை
யெல்லாம் வேரொடு பறித்து உருட்டிக்கொண்டு போயிற்று என்பது. பல
மலைகளினின்று பெருகிவந்த வெள்ளமெல்லாம் சரயு என்ற ஆற்றில்
சேர்ந்து விரைந்து சென்றது எனக் கொள்க.
                                                          (8)

     (இ - ள்.) ஏலம், தகரம், இலவங்கம், அரித்திரம், தக்கோலம்,
வசவாசி, செங்குங்குமம், கோட்டம் வாரி - ஏலம் முதலிய பொருள்களை
வாரிக்கொண்டு, தாலம் பதினாலும் நடுங்கிட - பதினான்கு உலகங்களும்
நடுங்கும்படி, சார்ந்த ஊழிக்காலம் தனில் மோது கருங்கடல் ஒத்தது -
வந்து பொருந்துகின்ற யுக முடிவு ஊழிக்காலத்தில் வந்து மோதுகின்ற
பெரிய கடல்போலச் சரயு வெள்ளம் பெருகியது.

     அம்மா : வியப்பு இடைச்சொல். ஏலம் தகர முதலிய வாசனைப்
பொருள்கள் தரும் மரங்கள் இவற்றையும் வாரியது. தாலம் - பூமி.
பதினான்கு ஆவன : மேலேழ் பூமி, கீழ் ஏழ் பூமி இருப்பதாக இலக்கியம்
கூறு முறை. சரயுநதி ஊழிக்காலத்து மேலெழுந்துவரும் கருங்கடல்போலத்
தோன்றியது என்பது.
                                                     (9)

     (இ - ள்.) நீலம், வைரம், வைடூரியம், நித்திலம், செங்கோலம், திகழ்
துகிர், கோமளப்பத்மராகம் - நீலம், வைரம், வைடூரியம், முத்து,
செந்நிறமாக விளங்குகின்ற பவளம், அழகிய பதுமராகம் ஆகிய மணிகள்
ஆற்றுநீரில் விரவி உருண்டு ஒளி வீசி வருதலால், தாலம் தனில் வந்தது
ஓர் இந்திர சாபம் என்ன - வானத்திலிருந்து பூமியில் வந்துற்ற ஒப்பற்ற
இந்திர வில்லைப்போல, ஓலம் திகழ் ஆற்றின் ஒழுக்கு எறிந்து ஓடிற்று -
ஒலி மிகுந்து விளங்குகின்ற ஆற்றில் நீரோட்டம் கரைகளில் அலை
மோதிக்கொண்டு ஓடினது. ஒழுக்கு : முதனிலைதிரிந்த தொழிற்பெயர்; ஓடு :
பகுதி. இன் : இறந்தகால இடைநிலை. று : ஒன்றன்பால் வினைமுற்று விகுதி.
வான வில்லின் நிறம் நீலம், வெள்ளை, சிவப்பு, பச்சை, மஞ்சள், கறுப்பு
ஆகிய எழுவகை நிறங்களும் கலந்தது. ஆதலாற் பலவகைப் பட்ட நிறம்