சந்திரமதிக்கு அவந்தி நாட்டரசனைக் காட்டல்
334.	இகழ்ந்திடு மதன்புவி புரந்திட வளர்ந்தெழு    இளம்கொடி இவன் நிகழ்ந்தஅர விந்தமணி தண்கழனி எங்கணும்    நிறைந்து நிரவப் புகழ்ந்தகட வின்கன இருப்பன குளம்பிடை    புதைந்து முனையின் அகழ்ந்துழு தடம்கொழு நெடும்தலை மடிந்திடும்    அவந்தி அரசே.

     (இ - ள்.) இகழ்ந்திடும் மதன் புவி புரந்திட - ஞானிகள்
இகழ்கின்ற மன்மதன் இவ்வுலகினை ஆளும்படி, வளர்ந்து எழும்
இளங்கொடி - வளர்ந்து எழுகின்ற இளமையான கொடிபோன்ற
சந்திரமதியே!, இவன் - இவ்வரசன், நிகழ்ந்த அர விந்த மணி - நீரில்
உள்ள தாமரைகளில் தோன்றிய ஒளிபொருந்திய முத்துகள், தண் கழனி
எங்கணும் - குளிர்ந்த வயல்களில் எல்லாம், நிறைந்து நிரவ - நிறைந்து
பரவ, புகழ்ந்த கடவில் - புகழத்தகுந்த எருமைக்கடாவின், கன இரும்பு
அன குளம்பிடை புதைந்து - கனமான இரும்பு போன்ற குளம்புகளின்
இடையில் அழுந்திப் பதிந்து, முனையின் அகழ்ந்து - முனையினால்
ஆழமாக நிலத்தைப் பிளந்து, உழு தடங்கொழு நெடுந் தலை - உழுகின்ற
பெரிய கொழுக்களின் நீண்ட தலைப்பாகத்தால், மடிந்திடும் - உடைந்து
போகின்ற, அவந்தி அரசே - அவந்தி மன்னனேயாவன்.

     மன்மதன் உலகமக்களை மயக்கித் தனது அரசு செலுத்துவதற்குச்
சந்திமதியின் கொடி போன்ற மேனி துணை புரிகின்றது என்பதாம்.
எங்கணும் : உம்மை முற்றும்மை. அன : உவம உருபு. தடம் கொழு :
உயிர்ச்சொற்றொடர் கடா என்பது குறியதன்கீழ் ஆக் குறுகிக் கட
என்றாகி உகரம் ஏற்றுக் 'கடவு' என்றாயது.
                                                   (230)

 

	சந்திரமதிக்கு மத்திர மன்னனைக் காட்டல்
335.	புத்தமுதம் ஒத்தமொழி வெற்பைநிகர் ஒத்ததன    பொற்றொடி இவன் சுத்தநிபு ணக்குசலர் சொற்கரிவ ழுக்கரிய    சுத்தநெ றியான் முத்தணிந கைச்சியர்த னத்திடைதி மிர்த்தெறி    முழுக்கல வையில் மத்தகர டக்கரி வழுக்குறு தெருச்செறியும்    மத்திரா பிரான்.

     (இ - ள்.) புத்தமும் ஒத்த மொழி - புதிய அமுதம் போன்ற
மொழியையும், வெற்பை நிகர் ஒத்த தன - குன்றுகளை முற்றிலும்
ஒத்திருக்கும் தனங்களையும் உடைய, பொற்றொடி - பொன்னாலாகிய