அரிச்சந்திரனும் சந்திரமதியை நோக்கல்
340.	அங்கைவேன் மன்னனும் ஆசை மீக்கொள மங்கைதன் பங்கய வதனம் நோக்கினான் செங்கயற் கண்ணினாள் திருக்க ழுத்தினில் மங்கள நாணுறீஇ வயங்கக் கண்டனன்.

     (இ - ள்.) அம் கை வேல் மன்னனும் - அழகிய கையிலே வேலை
யேந்திய அரிச்சந்திர வேந்தனும், ஆசை மீக்கொள - சந்திரமதியின் மேல்
காதல் மிகக் கொண்டு, மங்கை தன் பங்கய வதனம் நோக்கினான் -
சந்திரமதியின் தாமரைமுகத்தைக் காதலோடு பார்த்தான், செங்கயல்
கண்ணினாள் திருக் கழுத்தினில் - சிவந்த கயல்போன்ற கண்களையுடைய
சந்திரமதியின் அழகிய கழுத்தில், மங்கள நாண் உறீஇ வயங்கக் கண்டான்
- திருமங்கல நாண் பொருந்தி விளங்குதல் கண்டான்.

     பங்கய வதனம் : உவமைத்தொகை; கயல் கண்ணாள் என்பதும் அது.
செங்கயல் : பண்புத்தொகை. உறீஇ : சொல்லிசையளபெடை. கண்டனன் -
காண் : பகுதி, ட் : இறந்தகால இடைநிலை; அன் : சாரியை; அன் :
படர்க்கை ஆண்பால் வினைமுற்று விகுதி. கழுத்தை உயர்த்தி நீட்டிச்
சந்திரமதி அரிச்சந்திரனை நோக்கியபோது அவன் மங்கல நாணைக்
கண்டான் என்க.
                                                   (236)

 

	சந்திரமதி கழுத்தில் திருமங்கிலிய மிருக்கக் கண்டு  'திருமணஞ் செய்யலாமோ?' என அரிச்சந்திரன்            மாமனைக் கேட்டல்
341.	கன்னிஎன் றெண்ணினம் கன்னி யோஅலள் முன்னரே மங்கலம் பூண்ட மொய்குழல் இன்னமும் ஒருவருக் கெய்து மோஎனா மன்னவன் மாதுலற் குரைவ ழங்கினான்.

     (இ - ள்.) கன்னி என்று எண்ணினம் - இவளைக் கன்னியென்று
கருதினோம், கன்னியோ அலள் - இவள் கன்னியாய் இல்லை, முன்னரே
மங்கலம் பூண்ட மொய் குழல் - இதற்கு முன்னமேயே திருமங்கிலியம்
தரித்த அடர்ந்த கூந்தலையுடைய பெண், இன்னமும் ஒருவருக்கு எய்துமோ
எனா - முதலிலேயே ஒருவருக்குத் திருமணம் செய்யப் பெற்றவள்
இன்னமும் ஒருவரை அடையமுடியுமோ என்று கருதி, மன்னவன்
மாதுலற்கு உரை வழங்கினான் - அரிச்சந்திர மன்னன் தன் மாமனான
சந்திரதயனைக் கேட்டான்.

     மொய் குழல் : வினைத்தொகைப்புறத்துப்பிறந்த அன்மொழித்
தொகை. எய்தும் + ஓ : ஓகாரம் ஐயம்பற்றிய வினா. கன்னியோ - ஓ :
வியப்பு இடைச்சொல். முன்னர் - அர் : பகுதிப்பொருள் விகுதி. எனா :
செய்யா என்னும் வாய்பாட்டு வினையெச்சம்.
                                                   (237)