திருமணமான பெண்ணை மீட்டும் திருமணஞ்செய்தல் சிறுகுலத்தார்
            தொழிலென அரிச்சந்திரன் கூறல்

342.	பொறுத்துமுன் மங்கலம் பூண்ட பேதையை மறுத்திரண் டாவது மணம்மு டிப்பரோ சிறுத்தவர் செய்தொழி றிரைவ ரைப்பிதின் நிறுத்தினீர் நீரெனா நெடிது கூறினான்.

     (இ - ள்.) பொறுத்து முன் மங்கலம் பூண்ட பேதையை- கழுத்தில்
முன்னமேயே திருமங்கிலியந் தாங்கிப் பூண்டிருக்கும் பெண்ணை, மறுத்து
இரண்டாவது மணம் முடிப்பரோ - அதனை நீக்கி இரண்டாவது திருமணம்
முடிப்பார்களோ !, திரை வரைப்பு இதில் - கடல்சூழ்ந்த உலகில், சிறுத்தவர்
செய் தொழில் - இது சிறுகுலத்தவர் செய்கின்ற செயலாகும், நீர் நிறுத்தினீர்
என - இச் செயலை உயர்குடிப் பிறந்த நீவிரும் சுயம்வரமாக நாட்டினீர்
என்று, நெடிது கூறினான் - கோபத்தோடு மொழிந்தான்.

     பொறுத்து : தாங்கி, தரித்து. முடிப்பர் + ஓ - ஓகாரம் எதிர்மறை.
திரை வரைப்பு இதில் - கடல் எல்லையையுடைய இப்பூமியில்.
                                                   (238)

 

	சந்திரதயன் பெருமகிழ்ச்சி
343.	வள்ளல்ஈ துரைத்தலும் மதித யன்றன துள்ளம்விட் டோங்கிய உவகை அம்பெரு வெள்ளம்உள் ளடக்கிளே வேந்தர் காள்இவன் கள்ளமோ மெய்ம்மையோ கட்டு ரைத்ததே.

     (இ - ள்.) வள்ளல் ஈது உரைத்தலும் - வள்ளலாகிய அரிச்சந்திரன்
இதனைச் சொன்னவுடன், மதிதயன் தனது உள்ளம் விட்டு ஓங்கிய
உவகையம் பெரு வெள்ளம் - மதிதயன் தனது மனத்தினின்றும் பொங்கி
எழுந்த மகிழ்ச்சியாகிய பெருவெள்ளத்தை, உள்ளடக்கி - மனத்தில்
அடக்கிக்கொண்டு, வேந்தர்காள் - அரசர்களே !, இவன் கட்டுரைத்தது
கள்ளமோ மெய்ம்மையோ - இவன் உறுதியாக உரைத்தது பொய்யோ,
மெய்யோ ? (என்று வினவினான்.)

     உவகையம் - அம் : சாரியை. ஓகாரம் : ஐயம்;

     ஏகாரம் : அசை. இது, ஈது எனச் சுட்டு நீண்டது. வேந்தர்கள் -
வேந்தர்காள் என விளியாயிற்று; அரிச்சந்திரன் கூறுவது மெய்யா பொய்யா
ஆய்ந்து கூறுவீர் என்றான் மதிதயன்.
                                                   (239)

 

	அரிச்சந்திரன் கூறுவது பொய்யென ஏனை அரசர் கூறுதல்
344.	தையலாள் கழுத்தினில் தாலி உண்டெனில் கையினால் கண்ணுறக் காட்டு நீரெனச் செய்கை அறைந்தணி மூக்கிற் சேர்த்திஇவ் வையனும் பொய்யனென் றரசர் கூறினார்.