(இ - ள்.) வீயும் வேங்கையும் மந்தியும் - பறவைகளையும்
புலிகளையும் குரங்குகளையும், மேதகு வீயும் வேங்கையும் மந்தியும் -
மேலான பூக்களையும் வேங்கை மரங்களையும் வண்டுகளையும், வீழ்
பலாக்காயும் - யாவரும் விரும்பத்தக்க பலாக்காய்களையும், பால் -
ஆற்றின் பக்கத்தில், அயில் - நீரைக் குடிக்க வரும், கை கயமும் கொடு
- துதிக்கைகளையுடைய யானைகளையும் வாரிக்கொண்டு, காயும் பாலையில்
வந்து கலந்தது - சுடுகின்ற பாலை நிலத்தில் சரயு ஆறு வந்து சேர்ந்தது.

     கொடு : தொகுத்தல் விகாரம். ஏகாரம் : ஈற்றசை. உம்மை எண்ணும்மை.

     வீயும் வேங்கையும் என்பதற்கு, இறந்த புலிகளையும் என்றும்
பொருள் கூறலாம். பால் - பக்கத்தினின்று. அயில் - (நீர்) பருகும்.
அயில் - ஐயில் என வந்தது போலி. மயல் - மையல் என வருவது
போன்றது. இதுவும் இரண்டடி மடக்கு.
                                                    (16)

     (இ - ள்.) தேரும் ஆறு உணராச் சின வேடர் - தெளிந்த
நன்னெறி இன்னதென்றறியாது வழிப்பறி செய்யும் தொழிலினராகிய
சினத்தையுடைய வேடர்கள், பேய்த் தேரும் ஆறும் உள் தேறு அரும்
பாலையில் - கானலையும் ஆற்று வெள்ளத்தையும் தம்முள் பகுத்தறிய
முடியாத பாலை நிலத்தில், ஊரும் மாதர் யாரையும் உந்தி - ஊர்களையும்
மகளிர் எல்லாரையும் தள்ளிக்கொண்டு, மான் ஊரும் மாதரி தாள்
தொழுது உற்றது - கலைமானை ஊர்தியாக்கொண்ட துர்க்கையின்
திருவடிகளைத் தொழுது வந்து சேர்ந்தது.

     பேய்த்தேர் - கானல். உள் + தேறு + அரும் = உட்டேறரும். மாதர்
+ யாரையும் = மாதரியாரையும். மாதரி - துர்க்கை. கானல் என்பது சூரியன்
வெயிலின் தோற்றத்தால் நீரில்லா இடங்களில் நீர் போலத் தோன்றும்
இடம், "கானலை நீரென் றெண்ணிக் கடுவெளி திரியு மான்போல்" என்று
கூறுவதும் காண்க. இதுவும் இரண்டடி மடக்கு.
                                                    (17)

     (இ - ள்.) பூம் புனல் ஆறு - அழகிய சரயு ஆறு, அம்
கோங்கம் இருப்பையின் பூந்துணர் இற - அழகிய கோங்கு மரம்
இருப்பை மரங்களின் பூங்கொத்துகள் ஒடியவும், இறவு அங்கு ஓங்க -
இறால் மீன்கள்