அரிச்சந்திரனும் சந்திரமதியும் கோட்டைவாயில் தெருக்கள்
முதலியவற்றைக் கடந்து தம் அரண்மனைக்குள்ளே புகுந்தனர் என்பது.
                                                   (284)

 

	இன்ப வாழ்க்கை
389.	முளைத்த வெற்பன கோயிலின் முதிர்மலர் அணைமேல் இளைத்த நுண்ணிடை இரதியும் காமனும் எனத்தாம் விளைத்தநல் இன்ப வெள்ளத்து வேந்தனும் மயிலும் திளைத் திளைத்தருள் பொழிந்திடக் கழிந்தன சிலநாள்.

     (இ - ள்.) முளைத்தவெற்பு அனகோயிலின் - தானே தோன்றின
மலைபோன்ற அரண்மனையில், முதிர் மலர் அணைமேல் - மிகுந்த பூக்கள்
பரப்பிய மெத்தைமேலே, இளைத்த நுண்ணிடை இரதியும் காமனும் என -
மெல்லிய நுட்பமான இடையையுடைய இரதியும் மன்மதனும் போல, தாம்
விளைத்த நல் இன்ப வெள்ளத்து - தாங்கள் ஆக்கிக் கொண்ட நல்ல
இன்பவெள்ளத்தில், வேந்தனும் மயிலும் - அரிச்சந்திரவரசனும்
மயில்போன்ற சாயலையுடைய சந்திரமதியும், திளைத்து அருள்
பொழிந்திடச் சிலநாள் கழிந்தன - ஒருவருக்கொருவர் அன்பு ததும்பிட
இவ்வாறு சிலநாட்கள் சென்றன.

     அன : தொகுத்தல்; உவம உருவு; மதில் மலர் : வினைத்தொகை;
நுண்ணிடை : பண்புத்தொகை; மயில் : உவமையாகுபெயர். நாள் :
பால்பகா அஃறிணைப்பெயர். அருள் பொழிந்திட - ஒருவர்மேல் ஒருவர்
அன்பு மிகுமாறு. அன்பு ஈன்ற குழவியருளாதலின் அன்பு முதிர்ந்தது எனக்
கொள்க.
                                                   (285)

 

	சந்திரமதி கருப்பந் தரித்தல்        கலி விருத்தம்
390.	தருவை ஒத்த கரத்தரிச் சந்திரன் அரிவை யைப்பிரி யாமல்அ ணைந்தநாள் மருவை உற்றதம லர்க்குழல் வல்லிதன் திருவ யிற்றில்க ருப்பந்தி கழ்ந்ததே.

     (இ - ள்.) தருவை ஒத்த கரத்து அரிச்சந்திரன் - கற்பகத்தருப்
போன்ற கைவண்மையுடைய அரிச்சந்திரன், அரிவையைப் பிரியாமல்
அணைந்தநாள் - பெண்ணாகிய சந்திரமதியைப் பிரியாது கூடிய நாட்களில்
ஒருநாள், மருவை உற்ற மலர்க் குழல் வல்லி தன் திருவயிற்றில் -
மணம்பொருந்திய பூக்களை அணிந்த கூந்தலையுடைய கொடிபோன்ற
சந்திரமதியின் மணிவயிற்றில், கருப்பம் திகழ்ந்தது - கருப்பம்
உண்டாயிற்று.

     ஏகாரம் : ஈற்றசை; ஒருநாளும் பிரியாமற் கூடித் கலந்திருந்த
போது வயிற்றில் சூல் விளைந்தது என்க.
                                                   (286)