அமராவதி நகர்ச் சிறப்பு
415.	மாட மண்டபம் மேடை மாமதில்    வாயில் ஞாயில் கபாடநீள் கூட கோபுரம் நீடு மாளிகை    கோல வேதிகை ஆலயம் நாட கம்பயில் சாலை சூளிகை    நாவ லங்கனி யூறல்பாய் ஆட கம்கொ டமைத்து மாமணி    யாலநி றைத்த அனந்தமே.

     (இ - ள்.) மாட மண்டபம் மேடை மாமதில் வாயில் ஞாயில்
கபாடம் நீள் கூட கோபுரம் நீடு மாளிகை கோல வேதிகை ஆலயம் -
மாடங்களும் மண்டபங்களும் மேடைகளும் பெரிய மதில்களும்
வாயில்களும் மதில் உறுப்புகளும் கதவுகளும் நீண்ட கூடங்களும்
கோபுரங்களும் உயர்ந்த மாளிகைகளும் அழகிய திண்ணைகளும்
கோயில்களும், நாடகம் பயில் சாலை - நாடகம் ஆடுகிற
நாடகசாலைகளும், சூளிகை - சிகரங்களும், நாவலம் அம் கனி ஊறல்
பாய் - நாவற்கனியானது இரதம் பாய்கின்ற, ஆடகம் கொடு அமைத்து -
சாம்பூநதம் என்னும் பொன்னால் அமைத்து, மா மணியால் நிறைத்த
அனந்தம் - பெரிய மாணிக்கக்கற்கள் பதிக்கப்பெற்ற இவைகள் ஒவ்வொரு
வகையும் எண்ண முடியாதனவாம்.

     மா மதில்: உரிச்சொற்றொடர், கூட கோபுரம்: உம்மைத்தொகை;

     ஏகாரம் : ஈற்றசை. நாவற்கனிச்சாறு பாய்கின்ற இடத்திலே
தோன்றியதனால் சாம்பூநகம் எனப் பெயர்பெற்றது. அதுவே உயர்ந்தது.
ஆடகம், கிளிச்சிறை, சாதரூபகம், சாம்பூநதம் என்று நால்வகைப் பொன்
என அறிக.
                                                     (4)

 

416.	வேத சாலையும் யாக சாலையும்    யோக சாலையும் மின்னனார் கீத சாலையும் நாத மேதரு    கின்னரம் பயில் சாலையும் காத லானவர் யாவரும் தொடர்    காம சாலையும் மாபலிப் பூத சாலையும் மாறி லாஅனு    போக சாலையும் ஊர்எலாம்.

     (இ - ள்.) வேத சாலையும் யாக சாலையும் யோக சாலையும் -
வேத சாலைகளும் யாக சாலைகளும் யோகம் பயிலிடங்களும், மின்
அனார் கீத சாலையும் - மின் போன்ற பெண்கள் சங்கீதம் பயில்கிற
சாலைகளும், நாதமே தரு கின்னரம் பயில் சாலையும் - இசையைத்
தருகின்ற கின்னரம் என்னும் கருவி பழகுகிற சாலைகளும், காதலானவர்
யாவரும் தொடர் காம சாலையும் - காதலர் எல்லோரும் ஒருவரை
ஒருவர் தொடர்ந்து செல்லத்தக்க காம சாலைகளும், மாபலி பூத
சாலையும் - பெரும் பூசை செய்யத்தக்க