சிம்மாசனத்தின்மேல், மாதொடும் - இந்திராணியுடனே, வேத நூற்பயன்
அறிந்து உணர் குரவர் தம்மொடு - வேதநூற்பயனைத் தெரிந்துணர்ந்த
ஆசிரியர்களுடன், பாகசாதனன் மேவினான் - தேவேந்திரன்
கொலுவீற்றிருந்தான்.

     பாகசாதனன்: காரணப்பெயர். பாகன் எனபவன் விருத்திராசுரனின்
தம்பி ; விருத்திராசுரனை இந்திரன் கொன்றதைக்கேட்ட பாகன்
இந்திரனோடு எதிர்த்துப் போர்புரிந்து இந்திரனாற் கொல்லப் பட்டான்.
பாகனைக் கொன்ற காரணத்தால் இந்திரன் பாகசாதனன் எனப்பட்டான்.

     மயன் என்பவன் தெய்வத்தச்சன்; அவன் இவ்வாறு இக் கட்டடம்
அமையவேண்டும் என்று நினைத்தால் அவ்வாறே யமைந்து நிற்கும்.
இவ்வியல்பு வாய்ந்தவன் அத் தச்சன். அவனாற் சமைக்கப்பட்டது
அவ்வரசிருக்கை மண்டபம் என்க. அம் மண்டபத்தில் இந்திரன்
அமர்ந்திருந்தான்.
                                                    (23)

 

435.	நரகி னின்றிடும் இருளை யும்திரு   மணிமு டிச்சுடர் நக்கிட விரகி னின்றொரு கோடி ஞாயிறு    மிக்கெ ழுந்தன வாம்எனப் பெருகி நின்றொளிர் மகர தோரணம்    மிசைசி றந்து பிறங்கிட வருகு நின்றணி கவரி கோடி    அரம்பை மாதர் இரட்டவே.

     (இ - ள்.) நரகில் நின்றிடும் இருளையும் - கீழுலகத்தினிற்கும்
இருளினையும், திருமணி முடி சுடர் நக்கிட - சிறந்த மணிகள் பதித்த
கிரீடத்திலெழுஞ்சுடர் நீக்கிடவும், விரகில் நின்று ஒருகோடி ஞாயிறும்
மிக்கு எழுந்தன ஆம் என - சூழ்ச்சியாக நின்று ஒருகோடி சூரியரும்
உயர்ந்து எழுந்தனர் என்று சொல்லும்படி, பெருகி நின்று ஒளிர் மகர
தோரணம் மிசை சிறந்து பிறங்கிட - பெருக்கமாக நின்று விளங்கும் மகர
தோரணங்கள் மேலே சிறப்பாக விளங்கவும், அருகு நின்று அணி கவரி
கோடி அரம்பை மாதர் இரட்ட - அடுத்து நின்று அழகிய
வெண்சாமரையைப் பிடித்துக் கோடிக்கணக்கான மாதர்
வீசிக்கொண்டிருக்கவும்;

     இது அடுத்த கவியோடு தொடரும். குளகம் இது. நக்கிட, என,
பிறங்கிட, இரட்ட, மன்னன் இருந்தனன் (25) என முடிக்க. மகர
தோரணங்கள் பல ஒளி வீசுவன ஞாயிறு பல ஓரிடத்தில் தோன்றின
என்று சொல்லும்படி தெரிந்தன என்க.
                                                    (24)

 

436.	வெண்ணி ழற்றிகழ் முத்த நீள்குடை    மேனி ழற்றுவ தாயிரம் கண்ணி ழற்ப டவேஇ ருண்டு    கறுத்து மீளவே ளுப்பதாய்த் தண்ணி ழற்செய இந்தி ராணி    தடம்பெ ருங்குழ லாயகார் ஒண்ணி ழற்றிரு மேனி தாவிட    உம்பர் மன்னன் இருந்தனன்.