நசை பூண் வசிட்டன் - கர்ப்பூர மணம் வீசும் அருந்ததியிடம் காதல்
கொண்ட வசிட்ட முனிவனும், வீரத்துவாசம் - தனது வீரமணமே, திசை
வீசிய - எண் திக்கிலும் கமழ்ந்த. கோசிகன் - விசுவாமித்திரனும்,
அந்நேரத்து - அப்பொழுது, வாசவனை நண்ணி - இந்திரனை அடுத்து,
நிறைந்து அணைந்தார் - குழுமிச்சேர்ந்தார்.

     அருந்ததி வடதிசையில் நட்சத்திர வடிவாயிருத்தலின் வடமீன்
எனப்பட்டாள் ; விசுவாமித்திரருடைய தவவீர மணம் எண்திசையும்
பரவியது இந்திரனிடத்திற்கு மேற்கூறிய முனிவர்கள் யாவரும் வந்து
சேர்ந்தனர் என்க.
                                                    (29)

 

	இந்திரன் கூறுதல்
441.	அருமா மணிஆ தனம்அன்னவர் யார்க்கு நல்கி இருமா தவத்தீ ரெனயாரு மிருந்த பின்னர் திருமா முடிசாய்த் தெழிற்செங்கை அமைத்து விண்ணோர் பெருமான் கனிவாய் மலர்ந்தின்னன பேச லுற்றான்.

     (இ - ள்.) அன்னவர் யார்க்கும் - அம்முனிவர் யாவர்க்கும்,
அருமா மணி ஆதனம் நல்கி - அருமையான மணிகள் அழுத்தப்பெற்ற
ஆசனங்களைக் கொடுத்து, மாதவத்தீர் இரும் என - பெரிய
தவமுனிவர்களே அமருங்கள் என்றுகூறி, யாரும் இருந்த பின்னர் -
எல்லோரும் இருந்த பிறகு, விண்ணோர் பெருமான் - தேவர்கோனாகிய
இந்திரன், திருமா முடி சாய்த்து - அழகிய பெருமை பொருந்திய
கிரீடத்தோடு தலைவணங்கி, எழில் செங்கை அமைத்து அழகிய சிவந்த
கைகளைத் தாழ்த்தி, கனி வாய் மலர்ந்து - கொவ்வைக் கனிபோன்ற வாய்
திறந்து, இன்னன பேசல் உற்றான் - இத்தகைய சொற்களைப் பேசத்
தொடங்கினான்.

     அருமணி : பண்புத்தொகை, மா மணி : உரிச்சொற்றொடர். மாதவம்
: உரிச்சொற்றொடர் ; யார்க்கும் : உம்மை முற்றும்மை : பின்னர் - அர் :
பகுதிப்பொருள் விகுதி : கனி வாய் : உவமத்தொகை. உற்றான் - உறு :
பகுதி ; ஆன்: ஆண்பால் வினைமுற்று விகுதி. பகுதி ஒற்று இரட்டித்து
இறந்தகாலங் காட்டிற்று. யாவர் என்பது யார் என்றாயது.
                                                    (30)

 

	இந்திரன் வினவுதல்
442.	பாய்மைக்க லோலக் கடல்சூழ்புவிப் பார்த்தி வர்க்குள் தீமைக்கும் வேகச் சிலுக்குக்கும் இடங்கொ டாது வாய்மைக்கு நன்னூல் வளனுக்கு மனத்தி லுற்ற தூய்மைக்கும் மிக்கார் தமைஆய்ந்துநீர் சொன்மி                                  னென்றான்.

     (இ - ள்.) பாய் மைக் கல் ஓலக் கடல் சூழ் புவி -
அலைமோதுகின்ற நீலநிறம் பொருந்திய கல்லென்று ஓலிக்கின்ற கடல்
சூழ்ந்த உலகத்திலுள்ள, பார்த்திவர்க்குள் - அரசர்களுக்குள், தீமைக்கும் -
தீச்செயல்களுக்கும், வேகச் சிலுக்குக்கும் - விரைந்து பற்றுகின்ற
குற்றங்களுக்கும், இடங் கொடாது - சிறிதும் இடங் கொடாமல்,
வாய்மைக்கும் நன்னூல் வளனுக்கும் -