முனிவர்கள், அல்ல தாயினும் - நீ கூறுவது நன்மையற்றதாயிருந்தாலும்,
நின் சொல் மறுத்திடல் வல்லமோ என்று கூறினார் - உன்னுடைய
சொல்லை மறுக்க முடியுமோ என்று கூறினார்கள்.

     ஓகாரம் : எதிர்மறைப்பொருளில் வந்தது. நல்லது என மேல்
வந்ததால் 'அல்லது என்பதற்கு நல்லது அல்லது எனப் பொருள்
கூறப்பட்டது. தீமைசெய்யும்படி நீ கூறினும் அதனையும் செய்வோம் என்ற
கருத்து, முனிவர் 'நின் சொல்லை மறுத்திடல் வல்லமோ' என்றதால்
விளங்கிற்று
                                                     (7)

 

	அரிச்சந்திரன்பால் வேள்விக்குப் பொருள் கேட்டு வர         முனிவரை விடுத்தல்
466.	அருள் அயோத்தி அரிச்சந்தி ரனையுற் றிருள றும்பெரு வேள்விக்கி யான்சொலும் பொருட ரும்படி இன்று பொருத்திநீர் வருக என்று மறைமுனி கூறினான்.

     (இ - ள்.) அருள் அயோத்தி அரிச்சந்திரனை உற்று -
கருணையுடைய அயோத்தி மன்னனாகிய அரிச்சந்திரனை அடைந்து,
இருள் அறும் பெரு வேள்விக்கு - அஞ்ஞானம் நீக்கும் பெரிய
யாகஞ்செய்வதற்காக, யான் சொலும் பொருள் தரும்படி - நான்
சொல்லுகின்ற பொருள் தரும்படி, இன்று பொருத்தி நீர் வருக என்று -
இப்பொழுதே அவனை இசையச்செய்து வாருங்கள் என்று, மறைமுனி
கூறினான் - வேதமறிந்த விசுவாமித்திரன் கூறினான்.

     வேள்விக்கி யான் : குற்றியலிகரம், சொலும் : தொகுத்தல் ; வருக :
வியங்கோள் வினைமுற்று, மறைமுனி - மறையையாய்ந்த (சேர்ந்த) முனி :
இரண்டாம்வேற்றுமை உருபும் பயனும் உடன் தொக்க தொகை.

     யான் கூறுமளவு பொருள் தரும்படி அரிச்சந்திரனை இசைவித்து
வாருங்கள் என்று முனிவரை நோக்கி விசுவாமித்திரன் கூறினான் என்பது.
                                                     (8)

 

	முனிவர்கள் கோசலநாடு செல்லுதல்
467.	கேட்ட போதில் எழுந்து கிரிப்பெருங் காட்டை நீங்கிக் கடிபொழில் நீங்கியே கூட்ட மோடு குளிர்புனற் கோசல நாட்டை நண்ணினர் நான்மறை ஆளரே.

     (இ - ள்.) கேட்ட போதில் - விசுவாமித்திரன் சொற்களைக்
கேட்டவுடன், நான்மறை ஆளர் - நான்கு வேதங்களிலும் வல்ல
முனிவர்கள். எழுந்து கிரிப் பெருங் காட்டை நீங்கி - புறப்பட்டெழுந்து
மலைகளையும் பெரிய காடுகளையும் கடந்துபோய், கடி பொழில் நீங்கி -
மணம் நிறைந்த சோலைகளையும் கடந்து, குளிர் புனல் கோசல நாட்டை
நண்ணினர் - குளிர்ந்த நீர்வளமிக்க கோசலநாட்டை அடைந்தார்கள்.