முனிவர் தம் வரலாறு கூறுதல்
472.	சந்தி ராதித்தர் தானவர் வானவர் இந்தி ராதிகள் யாவர்க்கும் எய்திட வந்தி ராஒரு வேள்வி வளர்ப்பதை நொந்தி ராமுற்ற நுண்ணிதின் எண்ணினோம்.

     (இ - ள்.) சந்திர ஆதித்தர் - சந்திர சூரியர், தானவர் வானவர்
- அசுரர்கள் தேவர்கள், இந்திராதிகள் - இந்திரன் முதலானவர்கள்,
யாவர்க்கும் - எவர்களாலும், எய்திட வந்திரா ஒரு வேள்வி வளர்ப்பதை
- செய்து முடிக்க ஒருவர்க்கும் தோன்றாத ஒப்பற்ற யாகம் செய்தலைக்
குறித்து, நொந்து இரா முற்ற நுண்ணிதின் எண்ணினோம் - வருந்தி இரவு
முழுதும் நுட்பமாக ஆலோசித்தோம்.

     முனிவர்கள் மன்னவனை நோக்கிச் சொல்வது இது. சூரியன்
சந்திரன் முதலான தேவர்களாலும் செய்து முடிக்கப்படாத ஒரு வேள்வி
செய்யக்குறித்தோம் என்றனர்.
                                                    (14)

 

	வேள்விக்குப் பொருள் மிகுதி வேண்டுமெனக் கேட்டல்
473.	வேந்த அப்பெரு வேள்விக் கிரும்பொருள் ஈந்தி டற்குரி யாரெவர் என்றியாம் ஆய்ந்த னம்உனை அன்றிமற் றில்லெனாப் போந்த னம்என மன்னன் புகலுவான்.

     (இ - ள்.) வேந்த - அரசனே!. அப்பெரு வேள்விக்கு - அந்தப்
பெரிய வேள்விக்கு, இரும் பொருள் ஈந்திடற்கு உரியார் - பெரும்
பொருள் கொடுப்பதற்கு உரியவர், எவர் என்று யாம் ஆய்ந்தனம் -
யாவரென்று நாம் ஆராய்ந்து பார்த்தோம், உனை அன்றி மற்று இல்
எனாப்போந்தனம் என - உன்னைத் தவிரவேறு எவரும் இல்லையென்று
உன்னிடம் வந்தோம் என்று கூற, மன்னன் புகலுவான் - அதற்கு
அரிச்சந்திரன் சொல்லுவான்.

     எனா: செய்யா என்னும் வாய்பாட்டு வினையெச்சம். 'உயர்ந்த
வேள்விக்குப் பொருள் மிகுதிவேண்டும்; அப்பொருள் வழங்கத்தக்க
மன்னவர் உன்னையன்றி வேறிலர். ஆதலால் உன்பால் வந்தோம்'
என்றனர். அப்போது மன்னன் புகல்கிறான்.
                                                    (15)

 

	அரசன் 'பொருள் வழங்குவேன்' என்றல்
474.	பரவும் இப்பொருள் பற்றவும் மிக்கது தரல்எ னக்கியல் பென்றரிச் சந்திரன் திரவி யங்கொடு வம்எனச் செப்பலும் பிரம சாரிகள் மீளவும் பேசுவார்.

     (இ - ள்.) பரவும் இப்பொருள் பற்றவும் மிக்கது - நல்வழிக்குப்
பயன்படுதலால் துதிக்கத்தக்க இப்பொருள் பெற்றுக்கொள்வதற்கும்