அதிகமாக, தரல் எனக்கு இயல்பு என்று - கொடுத்தலே எனக்கு
இயற்கையென்று, அரிச்சந்திரன் திரவியங் கொடுவம் எனச் செப்பலும் -
அரிச்சந்திரன் பொருள் கொண்டு வாருங்கள் என்று ஏவலாளரிடம்
கூறவும், பிரமசாரிகள் மீளவும் பேசுவார் - பிரமசரியநிலை மேற்கொண்ட
முனிவர்கள் திரும்பவும் பேசுவார்கள்.

     கொடு: கொண்டு என்பதன் தொகுத்தல்; வம்: ஏவற்பன்மை
வினைமுற்று.

     'வேள்விக்கு வேண்டும் பொருள் மிகுதியும் தருவது எனக்குத்
தக்கதுதான்' என்றுரைத்துப் பொருளைக் கொண்டு வருக என ஆணை
தந்தனன்; உடனே முனிவர்கள் சொல்லத் தொடங்கினர் என்பது.
                                                    (16)

  'வேள்வி புரிநாளிற் பெற்றுக்கொள்வோம்' என்று முனிவர் கூறல்   

     (இ - ள்.) இன்று வேண்டலம் - இப்பொழுது எங்களுக்கும்
பொருள் வேண்டுவதில்லை, யாகம் இயற்றிடும் அன்று எமக்கு நல்க
அமையும் என - நாங்கள் வேள்வி செய்கின்ற அக்காலத்தில் எங்களுக்குக்
கொடுத்தால் போதும் என்று முனிவர் சொல்ல, மன்னன் நன்று நன்று என
நவின்றபின் - அரசன் நல்லது நல்லது என்று கூறி இசைந்து
சொல்லியபிறகு. நின்று வாழ்த்தி நெடுநகர் நீங்கினார் - எழுந்து நின்று
அரசனை வாழ்த்தி அயோத்திப்பெருநகரை விட்டு அகன்றனர்.

     வேண்டலம்: தன்மைப்பன்மை எதிர்மறை வினைமுற்று; வேண்டு:
பகுதி. அல் : எதிர்மறை இடைநிலை; அம்: தன்மைப்பன்மை வினைமுற்று
விகுதி; அமையும்: செய்யுமென்னும் வாய்பாட்டு வினைமுற்று; நன்று நன்று:
அடுக்கு உவகைபற்றி வந்தது. நெடுநகர்: பண்புத்தொகை. நவின்ற: நவில்:
பகுதி; ற்: இறந்தகால இடைநிலை; அ; பெயரெச்ச விகுதி. நகர் நீங்கினார்:
ஐந்தாம்வேற்றுமைத்தொகை.

     ''இன்று நிதி வேண்டாம் வேள்விபுரியும் அன்று நல்கின் நலம்''
என்று கூறி முனிவர் நீங்கினார் என்க.
                                                    (17)

 

	முனிவர்கள் கோசிகனிடம் வருதல்
476.	செந்நெல் வெண்ணெல் விளையும் செறுக்களும் கன்னன் மன்னும் கழனியும் சோலையும் அன்னம் ஆடுந் தடமும் அகன்றுபோய்ப் பன்ன சாலைப் பழுவத்துள் எய்தினார்.

     (இ - ள்.) செந்நெல் வெண்ணெல் விளையும் செறுக்களும் -
சிவப்பு நெல்லும் வெள்ளை நெல்லும் விளைகின்ற வயல்களும், கன்னல்
மன்னும் கழனியும் - கரும்புகள் நிறைந்து வளர்கின்ற வயல்களும்,
சோலையும் - சோலைகளும், அன்னம் ஆடும் தடமும் -அன்னங்கள்
மகிழ்ச்சியோடு வாழ்கின்ற குளமும், அகன்று போய் - கடந்துபோய்,
பன்ன சாலைப் பழுவத்துள் எய்தினார் - பன்னசாலையையுடைய
காட்டுக்குட் போனார்கள்.