வாவியுங் பொழிலும் கோசிகனைக் கண்டு நடுங்கியதாகக் கற்பித்தல்   

479.	கெடுக்க வந்தனன் என்று கிலேசியா விடுக்க ணுற்றளந் தென்றல் இயம்பிட மடுக்க ளும்மலர் வாவியும் சோலையும் நடுக்கம் எய்தி அலைந்தன நாடெலாம்.

     (இ - ள்.) இளந் தென்றல் - இளமையான தென்றற் காற்றானது,
கொடுக்க வந்தனன் என்று கிலேசியா இடுக்கன் உற்று - கோசிகமுனி
நாட்டினையும் மன்னனையும் கெடுக்க வந்துவிட்டான் என்று
மனக்கினேசத்துடன் துயருற்று, இயம்பிட - யாவர்க்குஞ் சொல்லுவது
போன்று சலசல ஓசையுடன் வீச, மடுக்களும் மலர் வாவியும் சோலையும்
- காற்று அசைத்தலினால் குளங்களும் தாமரைத் தடாகங்களும்
சோலைகளும் நடுக்குற்றசைந்து, நாடு எலாம் அலைந்தன - நாட்டிலுள்ள
உயிர்ப்பொருள் உயிரற்ற பொருள் இயங்கும் பொருள் இயங்காப் பொருள்
யாவும் நடுக்குற்று அசைந்தன.

     கிலேசியா: செய்யா என்னும் வாய்ப்பாட்டு வினையெச்சம்; உம்மை:
எண்ணும்மை; நாடு : இடவாகுபெயர், எலாம் : தொகுத்தல்; தற்குறிப்பேற்ற
அணி, இயற்கையாகத் தென்றற்காற்றலைக்க அலையும் பொய்கை பொழில்,
பலவகையான உயிர்ப்பொருள்களைக் கோசிகன் வந்ததைத் தென்றல்
கூறக்கேட்டலைவதாகக் குறித்தலால்.
                                                    (21)

 

	கோசிகன் கருத்தினை மந்தியும் புள்ளும்   அறிந்தனவெனக் கற்பித்தல்
480.	கள்ள நீதிக் கவுசிகன் எண்ணிய துள்ள மார உணர்ந்திள மந்திகட் டுள்ளி நீங்கின சோலைக டோறுமென் புள்ளி ருந்தன பொய்கைக டோறுமே.

     (இ - ள்.) கள்ள நீதிக் கவுசிகன் எண்ணியது - கள்ளமான
முறையைக் கோசிகன் கருதியதை, உள்ளம் ஆர உணர்ந்து - மனமார
உணர்ந்து, இள மந்திகள் சிறிய குரங்குகள், சோலைகள் தோறும் -
சோலைகளிலெல்லாம், துள்ளி நீங்கின - துள்ளிக் குதித்து அவற்றை
விட்டு நீங்கின, பொய்கைகள் தோறும் தடாகங்களில் எல்லாம், மென் புள்
இருந்தன - மென்மையான பறவைகள் அஞ்சி அடங்கி இருந்தன.

     அஞ்சி அடங்கி என்பன அவாய்நிலையால் வந்தன. தற்குறிப்பேற்ற
அணி, இள மந்திகள் தாவிக் குதித்து ஓடியதையும், புட்கள்
அடங்கியிருந்ததையும் கோசிகன் கள்ளத்தைக் கண்டுதான் எனக் குறித்துக்
கூறியதால்.
                                                    (22)

 

	மீன், வாழை, நெல் இவையும் கோசிகன் கருத்தறிந்தன       என்று கற்பித்தல்
481.	அலைகள் சாய்த்தகல் வாவியின் மீனெலா நிலைகள் சாய்த்தயல் நீங்கின வாழைகள் குலைகள் சாய்த்தயல் குப்புற்று நின்றன தலைகள் சாய்த்தன சாலியின் ஈட்டமே.