(இ - ள்.) கண்ணெலாம் கனல் மண்ட - கண்களெல்லாம்
தீப்போல் எரிய, கடு விடம் மண் எலாம் குதிகொள்ள - கடுமையான
நஞ்சு பூவுலகு முழுதும் பரவ, மணிச் சுடர் விண் ஏலாம் வெயில் வீசிட
- தலையிலுள்ள நாகரத்தினங்களின் ஒளி வானுலகு முழுதும் ஒளி வீச,
எண்ணில் அரவு - கணக்கற்ற பாம்புகள், வாய் பிளந்து - வாயைப்
பிளந்துகொண்டு, எங்கும் வந்து ஈண்டின - எல்லா இடங்களிலும் வந்து
கூடின.

     கண் எலாம்: ஒருமை பன்மை மயக்கம்; அரவு: பால்பகா
அஃறிணைப்பெயர். எண்ண முடியாத பாம்புக்கூட்டங்கள் வந்து
சேர்ந்தன என்க.
                                                    (37)

 

	மான் முதலிய விலங்கினங்கள் வரவு
496.	மான ழுங்குபுல் வாய்மரை வாங்கலை ஏன நானம் எலிபெருச் சாளிஎய் கான மேதி கரடிசெந் நாய்நரி வான ரம்கட மாஇவை வந்தவே.

     (இ - ள்.) மான் அழுங்கு புல்வாய் மறை வாம்கலை ஏனம் நானம்
எலி பெருச்சாளி எய் கானமேதி கரடி செந்நாய் நரி வானரம் கடமா -
மான்கள் அழுங்குகள் மரைகள் தாவுகின்ற கலைமான்கள் பன்றி
புழுகுப்பூனைகள் எலிகள் பெருச்சாளிகள் முள்ளம் பன்றிகள்
காட்டெருமைகள் கரடிகள் செந்நாய்கள் நரிகள் குரங்குகள் காட்டு
மிருகங்கள், இவை வந்த - ஆகிய இவை வந்தன.

     மரை, அழுங்கு : ஒருவகை விலங்குகள், வாவும் + கலை = வாம்
கலை - வாங்கலை என்று நின்றது. வாவும் என்ற பெயரெச்சம் ஈற்றயல்
உயிர் மெய் கெட்டு நின்றதாகக் கொள்க. மான் முதற் கடமா இறுதியாகிய
விலங்கினங்கள் எல்லாம் வந்தன என்க.
                                                    (38)

 

	பலவகைப் பறவைகள் வரவு
497.	தோகை பூவை சுகங்குக்கில் சக்கர வாக நாரை மடஅனம் கோகிலம் காகம் அன்றில் சிவல்கவு தாரிபூழ் வேக மோடு பறந்து விரைந்தவே.

     (இ - ள்.) தோகை - மயில்கள், பூவை - நாகணவாய்ப்புட்கள்,
சுகம் - கிளிகள், குக்கில் - செம்போத்துக்கள், சக்கரவாகம் - சக்கரவாகப்
பறவைகள் நாரை - நாரைகள், மட அனம் - மடமை பொருந்திய
அன்னப்பறவைகள், கோகிலம் - குயில்கள், காகம் - காக்கைகள், அன்றில்
அன்றிற் பறவைகள், சிவல் - சிவல்கள், கவுதாரி - கவுதாரிகள், பூழ் -
காடைகள், வேகமோடு பறந்து விரைந்த - வேகமாகப் பறந்து விரைவில்
வந்து சேர்ந்தன.

     ஏகாரம் : ஈற்றசை; அனம் : தொகுத்தல்; மட அனம் :
பண்புத்தொகை. தோகை முதல் பூழ் ஈறாகச் சொல்லப்பட்ட
பறவைகளெல்லாம் விரைந்து பறந்து வந்தன என்க.
                                                    (39)