வந்தவையெல்லாம் முனிவரை வணங்குதல்
498.	முந்தி வந்த முதிர்சின மாக்களும் வெந்தி றற்கொடு வேகத்த நாகமும் பந்தி பந்தி பறவைத் திரள்களும் வந்து வந்து முனியை வணங்கின.

     (இ - ள்.) முந்தி வந்த முதிர்சின மாக்களும் - முன்னே வந்த
மிகுந்த சீற்றங்கொண்ட விலங்குகளும், வெம் திறல் கொடு வேகத்த
நாகமும் - வெம்மையான திறலும் கொடுமையான வேகமும் உடைய
பாம்புகளும், பந்தி பந்தி பறவைத் திரள்களும் - கூட்டம் கூட்டமாய்
வந்த பறவைக் கூட்டங்களும், வந்து வந்து முனியை வணங்கின - மேலும்
மேலும் வந்து விசுவாமித்திர முனியை வணங்கின.

     முதிர்சினம்: வினைத்தொகை; பந்தி பந்தி, வந்து வந்து: அடுக்குத்
தொடர் இது மிகுதிபற்றி வந்த அடுக்கு. முந்தி வந்தவை முந்தியும் பிந்தி
வந்தவை பிந்தியும் ஆகச் சென்று வணங்கின எனக்கொள்க.
                                                    (40)

 

	வரவழைத்த காரணம் வினாவுதல்
499.	தழைத்த புல்லும் தழையும் கனிகளும் விழைத்த ருந்தி வெருண்டு வெகுண்டுகோள் இழைத்து நீள்வனம் வாழ்கின்ற எம்மைநீ அழைத்த தீதென் றருள்செய வேண்டுமே.

     (இ - ள்.) தழைத்த புல்லும் - காட்டில் தழைக்கிருக்கிற புல்லையும்,
தழையும் - தழைகளையும் கனிகளும் - பழங்களையும், விழைத்து அருந்தி
- விருப்பத்தோடு தின்று, வெருண்டு வெகுண்ட கோள் இழைத்து -
எங்களிலும் வலியவற்றிற்குப் பயந்து மெலியவற்றைச் சினந்து
அடித்துச்சென்று தின்னும் கொள்கைகளைக் செய்து நீள்வனம் வாழ்கின்ற
எம்மை - பெரிய காடுகளில் வாழ்கின்ற எங்களை, நீ அழைத்தது ஈது
என்று அருள் செய்வேண்டும் - நீர் கூப்பிட்ட காரணம் இஃது என்று
சொல்லியருளவேண்டும் (என்றன).

     ஏகாரம் : ஈற்றசை; அழைத்தது: தொழிற்பெயர்: அழைத்த
அச்செயல் எனக் கொண்டு பெயரெச்சத் தகம் தொக்கதாகவும்
கொள்ளலாம். ஈது என நீண்டது, ஈது - இன்ன காரணம், ஈது எனக்
கூறவேண்டும் என்று கூற அடுத்த கவியிலுள்ளதை வருவித்து
முடித்துக்கொள்க.
                                                    (41)

 

	முனிவர் கூறுவது
500.	என்று கூற முனிவன் இயம்புவான் குன்று மேவு விலங்கின் குலத்துளீர் ஒன்று கூறுவ துண்டினி யானுமக் கின்று நீர்செய் பணிஎன் றியம்புவான்.