(இ - ள்.) என்று கூற - என்று பறவைகளும் மிருகங்களும் கூற,
முனிவன் இயம்புவான் - விசுவாமித்திரன் சொல்லத்தொடங்கி, குன்று
மேவு விலங்கின் குலத்துளீர் - மலைவாழ் மிருகக்கூட்டத்தைச்
சார்ந்தவர்களே!, யான் இனி உமக்கு ஒன்று கூறுவது உண்டு - நான்
உங்களுக்கு இனிமேல் ஒன்று கூறவேண்டியது இருக்கிறது. இன்று நீர்
செய் பணி என்று இயம்புவான் - அஃது இன்றைக்கு நீங்கள்
செய்யவேண்டிய வேலை என்று முனி கூறுவானாயினான்.

     இயம்புவான் முன்னையது முற்றெச்சம் பின்னையது வினைமுற்று.
உள்ளீர் - உள்ளவர்களே! என உயர்வுப்பன்மையில் அழைத்தான். தனக்கு
வேண்டும் உதவிபுரியும்படி ஏவுகின்றவனாதலால்.
                                                    (42)

 

	அரிச்சந்திரன் நாட்டினை யழிக்க ஆணை தருதல்
501.	தாரின் மன்னு புயத்தரிச் சந்திரன் பாரின் மன்னுயிர் பைம்பொழில் தண்பயிர் வேரி னோடும் களைந்து விரைந்துநீர் வாரும் என்று மறைமுனி ஏவினான்.

     (இ - ள்.) தாரின் மன்னு புயத்து அரிச்சந்திரன் - பூமாலைகளை
அணிந்த தோள்களையுடைய அரிச்சந்திரனுடைய, பாரில் மன்னுயிர் பைம்
பொழில் தண் பயிர் - நாட்டிலுள்ள நிலைபெற்ற உயிர்கள், பசுமையான
சோலைகள் குளிர்ந்த பயிர்கள் முதலியவற்றை. நீர் - நீங்கள் போய்,
வேரினோடும் களைந்து - வேரோடு பிடுங்கி, விரைந்து வாரும் என்று -
விரைவில் வாருங்கள் என்று, மறை முனி ஏவினான் - வேதங்களில் வல்ல
விசுவாமித்திரன் கட்டளையிட்டான்.

     மன்னுயிர்: வினைத்தொகை ; பைம் பொழில் - பசுமை+பொழில்:
பண்புத்தொகை. 'அரிச்சந்திரன் நாட்டிலுள்ள உயிர், பயிர், பொழில்
முதலியவற்றை அழித்து வருக' என ஆணை தந்தான் முனிவன் என்பது.
                                                    (43)

	விலங்குகளும் பறவைகளும் கோசலநாடு புகுதல்
502.	அக்க ணத்தில் இறைஞ்சி அருந்தவன் பக்க நின்ற விலங்கும் பறவையும் திக்க னைத்தும் செறிந்து விரைந்துபோய் புக்க அத்திரு நாட்டின் புறத்தெலாம்

     (இ - ள்.) அக் கணத்தில் - சொன்ன அப்பொழுதே, அருந்தவன்
இறைஞ்சி - பெருந்தவமுனிவனை வணங்கி, பக்கம் நின்ற விலங்கும்
பறவையும் - அவன் பக்கம் நின்ற மிருகங்களும் பறவைகளும், திக்கு
அனைத்தும் செறிந்து - எல்லாத் திசைகளிலும் நெருங்கி, விரைந்து
போய் - விரைந்து சென்று, அத் திருநாட்டின் புறத்து எலாம் - அந்த
அழகிய அயோத்தியா நாட்டின் வெளிப்பக்கங்களிலெல்லாம், புக்க -
புகுந்தன.