என்று பெயர் கூறப்படும், பறவை அனந்தம் - பறவைகள் எண்ணிலாதன.

     உம்மைகள் எண்ணும்மைகள். ஈற்றது பெயரெச்ச விகுதி,

     ஏகாரம் : ஈற்றசை.

     விலங்குகள் அழிப்பதுமன்றிப் பறவைகளும்கூட அவற்றுடன்
சேர்ந்து அழிக்கின்றன என்க.
                                                    (59)

     (இ - ள்.) மன்னவ - அரசனே, நாற்றம் ஏற்று வந்து - மனித
நாற்றம் வீசுவதை யறிந்து வந்து, எம்மை நலிந்திட - எம்மைத் துன்புறுத்த,
தோற்றும் ஆகுலச் சூழ்வினை தன்னை - இப்பிறவியில் தோற்றும்
துன்பமாகிய சூழ்வினையை, நீ மாற்றிடாய் எனின் - நீ நீக்காது போனால்,
எங்களால் ஆற்றொணாது என்று - எங்களால் தாங்கமுடியாது என்று,
அடி தொழுது ஏத்தினார் - அரசன் திருவடிகளை வணங்கித் துதித்தார்கள்.

     ஆற்ற ஒணா எனப் பெயரெச்சத்து அகரம் தொக்கது: ஒணா :
ஈறுகெட்ட எதிர்மறைப் பெயரெச்சம். மன்னவ : விளி. 'எங்கள் சூழ்வினை'
என்றது முற்பிறப்பில் நாங்கள் செய்த தீவினையால் இது வந்ததுபோலும்
என்பது கருத்து. 'ஆற்றொணாது' என்றது இறந்து படுவோம் எல்லாரும்
என்பதை விளக்கியது.
                                                    (60)

  சிவபெருமான்புரி திருவிளையாடல் போலும் இதுவெனச் சிந்தித்தல்   

519.	அங்கண் மாநிலத் தன்னநன் னாட்டவர் தங்கள் வாய்மொழி கேட்டரிச் சந்திரன் றிங்கள் சூடி திருவிளை யாட்டினுக் கெங்க ளாற்செய்வ தென்னென வெண்ணினான்.

     (இ - ள்.) அங் கண் மாநிலத்து அன்ன நன் னாட்டவர் தங்கள் -
அழகிய இடம் அகன்ற பேருலகில் அத்தகைய நல்ல நாட்டில் வாழ்கின்ற
நன்மக்களுடைய, வாய்மொழி கேட்டு - விண்ணப்பம் கேட்டு,
அரிச்சந்திரன் - அரிச்சந்திரன், திங்கள் சூடி திருவிளையாட்டினுக்கு -
சந்திரனை அணிந்த சிவபெருமானின் திருவிளையாட்டாகிய வினைப்பயன்
ஊட்டலுக்கு, எங்களால் செய்வது என் என எண்ணினான் - வலியற்ற
உயிர்களாகிய நாங்கள் என்னசெய்ய இயலும் எனக் கருதினான்.

     சிவபெருமானே உயிர்களுக்கு வினைப்பயனை எளிதாக ஊட்டுபவன்.
அதற்கு உயிர்கள் ஒன்றும் செய்ய இயலாது அனுபவித்துத்தான் பாவத்தை
நீக்கவேண்டும் என்பது மெய்கண்டநூற் கருத்து. அதனை அரிச்சந்திரன்