(இ - ள்.) அந்தரத்து இடி எனக் குரைத்து - வானத்தில்
உண்டாகும் இடி போலக் குரைத்து, முதிர் ஆழி போல் உறுமி - பெரிய
கடல்போல உறுமிக்கொண்டு, வார் தடம் கந்தரத்து இறுக நின்று உரப்பி
- கழுத்தில் கட்டிய வாரானது பெரிய கழுத்திலே இறுகும் படியாக நின்று
அதட்டி, இரு கால் மடக்கி - இரண்டு கால்களை மடக்கிக்கொண்டு, எதிர்
தாவி - முன்னே பாய்ந்து, தம் தமில் கறுவு கொண்டு - தங்கள் தங்களில்
வயிரங்கொண்டு, பல் பல தயங்க - பற்கள் பல விளங்கவும், வெம் கனல்
தடம் கணால் சிந்திட - வெப்பமான நெருப்பு பெரிய கண்களிலிருந்து
சிந்த, சருவி முன் கதித்து வருசெஞ் சுணங்கு - கிட்டி முன்னே
விரைவுடன் வருகின்ற செந்நிற நாய்கள், சதகோடி - அளவற்றன.

     தடம் கந்தரம் தடங்கண் : உரிச்சொற்றொடர்; குரைத்து, உறுமி,
உரப்பி, கால் மடக்கி. தாவியே, சருவி, கதித்து வரு செஞ் சுணங்கு எனக்
கூட்டுக. இதுவும் நாய்களின் இயற்கை கூறியது எனக் கொள்க.
                                                    (12)

 

	பலவகை நிறமுற்ற நாய் வரவு
533.	வெண்டை யம்கவடி கண்டை வாரெழில்    விளங்கு வெம்கன களங்களும் தண்டை கிண்கிணி சிலம்பு நின்றொலி    தழங்கிடும் கடிய தாள்களும் துண்ட வெண்பிறை இரண்டு நின்றெதிர்    துளங்க வெட்டெயிறு மாகவே மண்டலம் குழிய வந்த ஞாளிபல    வண்ண முள்ளசத கோடியே.

     (இ - ள்.) வெண்டையம் கவடி - வெண்டயங்களும் பல
கறைகளும், கண்டை - பெரிய மணிகளும், வார் - தோல் வார்களும்,
எழில் விளங்கு வெம் கன களங்களும் - (ஆகிய இவைகள் கூடி
விளங்குகின்ற வெம்மையான பருத்த கழுத்துகளும், தண்டை கிண்கிணி
சிலம்பு நின்று ஒலி தழங்கிடும் - சதங்கைகளும் சிலம்புகளும் நிலைத்து
நின்று சத்தமிடும், கடிய தாள்களும் - கடினமான கால்களும், துண்டவெண்
பிறை - துண்டமான வெண்மையான பிறை நிலவு, இரண்டு நின்று எதிர்
துளங்க - இரண்டு முன் எதிராக நின்று விளங்குவன போல், வெட்டு
எயிறு ஆக - வெட்டுகின்ற பற்களும் உடையனவாக, மண் தலம் குழிய
வந்த பல வண்ணமுள்ள ஞாளி - தரைகள் குழிவிழும் படி விரைந்து வந்த
பன்னிற நாய்கள், சதகோடி - நூறுகோடிக் கணக்காகும்.

     ஏகாரம் : ஈற்றசை, சதம் - நூறு. களங்கள் - கழுத்துகள்,
களங்களும், தாள்களும், எயிறும் ஆக வந்த ஞாளி எனக் கூட்டுக.
உடையன ஆகச் சொல் வருவத்துக் கொள்க.
                                                    (13)