(இ - ள்.) சிங்கம் ஆனை புலி பன்றி மான் மரை திரண்டு
அணைந்து - சிங்கங்களும் யானைகளும் புலிகளும் பன்றிகளும்
மான்களும் மரைகளும் திரண்டு கூடி, திரு நாடு எலாம் எங்கணும் பரவி
வந்து - அழகிய அயோத்திநாடு முழுதும் எல்லா இடங்களிலும் பரந்து
வந்து, தண் பயிர் யாவையும் கெட அழித்தலால் - குளிர்ச்சியான பயிர்
முழுதையும் நாசமாகும்படி அழித்தலால், அங்கு அவற்றை வதை
செய்வதற்கு - அம் மிருகங்களைக் கொல்வதற்கு, உமை அழைத்தனன் -
உங்களை அழைத்தேன், கடிது சென்ம் எனா - விரைந்து செல்லுங்கள்
என்று கூறி, உங்களுக்கு உதவியாக யாம் வருதலும் உண்டு என -
உங்களுக்குஉதவிபுரிய நானும் வருவேன் என்று, பல உணர்த்தினான் -
பலவகையான பணிகளை அவர்கள் உணருமாறு தெரிவித்தான்.

     எண்ணும்மைகள் தொக்கன; நாடெலாம் : ஒருமை பன்மை மயக்கம்;
எலாம் : தொகுத்தல்; எங்கணும் : உம்மை முற்றும்மை; சென்ம் :
முன்னிலை ஏவற்பன்மை வினைமுற்று; மகரக் குறுக்கம். எனா : செய்யா
என்னும் வாய்பாட்டு வினையெச்சம்.

     'பயிரை யழிக்கும் விலங்குகளைக் கொல்லவேண்டும்; அது குறித்து
உங்களை யாழைத்தேன்; நீங்கள்செல்லுங்கள்; நானும் உதவியாக
வருகிறேன்' என்றுமன்னன் கூறினான் என்பது.
                                                    (17)

 

538.	முன்ன டக்கஎன ஆடைஆ பரண    முற்றும் வேடுவர் தமக்களித் தன்ன வர்க்குவிடை நல்கி மண்டப    மகன்று போனபின் அமைச்சரைச் சென்னெ றிப்பட விரைந்து நீர்நமது    சேனை யோடினிது சென்மெனா தன்ன கத்திடை புகுந்துகற் புடைய    தையல்வை கும்இடம் எய்தினான்.

     (இ - ள்..) வேடுவர் தமக்கு - வேடர்களுக்கு, ஆடை ஆபரணம்
முற்றும் அளித்து - உடைகள் நகைகள் எல்லாம் கொடுத்து, முன் நடக்க
என - முதலில் போங்கள் என்று, அன்னவர்க்கு விடை நல்கி -
அவர்களுக்கு விடை கொடுத்து, மண்டபம் அகன்று போன பின் - அவை
மண்டபத்தை விட்டு நீங்கிப்போன பிறகு, அமைச்சரைச் சென்னெறிப் பட
விரைந்து - அமைச்சர்களைச் செல்லவேண்டிய வழியிற் செலுத்த முற்பட்டு,
நீர் தமது சேனையோடு இனிது சென்ம் எனா - நீவிர் நம்முடைய
சேனையுடன் செவ்விய முறையிற் போவீராக என்று கூறிவிட்டுத், தன்
அகத்திடை புகுந்து - தனது மாளிகைக்குள்ளே புகுந்து, கற்புடைய தையல்
வைகும் இடம் எய்தினான் - கற்புடைய பெண்ணாகிய சந்திரமதி
இருக்கின்ற அந்தப்புரத்தை அடைந்தான்.