(இ - ள்.) தாபமும் புனலும் கொள்வார் தாபதர் வந்து - நீர்
வேட்கையுடன் நீர் முகக்க வந்த முனிவர்கள், மாதர் தீபமும் அயோத்தி
வேந்தும் - பெண்களிற் சிறந்த ஒளிபோன்ற சந்திரமதியும் அயோத்தி
மன்னனாகிய அரிச்சந்திரனும், சேனையும் இருக்கக் கண்டு - சேனையும்
அவ்விடத்தில் இருத்தலைக் கண்டு, மன்னா - மன்னனே, கோசிகன்
கண்டால் - கௌசிக முனிவன் உங்களைக் கண்டால், கோபம் உற்று
அழன்று - கோபங்கொண்டு கண்கள் சிவந்து, உன்னைச் சாபம் இட்டு
எரிப்பன் - உன்னைச் சாபம் இட்டு எரித்துவிடுவான், ஈண்டு சார்ந்தது
தகாதே என்றார் - இங்கு நீ வந்து தங்கியது தகாத செயல் என்றனர்.

     அப்போது தவமுனிவர் தாகத்திற்கு நீர் எடுக்க வந்தவர்கள்
அரிச்சந்திரனைக் கண்டு 'நீங்கள் இங்கு இருப்பது கண்டாற் கோசிகர்
சினந்து சாபமிடுவார்' என்று கூறினர்.
                                                    (85)

 

606.	யாமவற் கடிமை அன்றோ எம்வயிற் சீற்றம் என்னோ யாமவற் கிழைத்த தீங்குண் டென்னினும் திருத்திப்                                    பின்னைப் போமதே கருமம் என்னாப் புரவலன் புகலக் கேட்டீண் டாமதே காண்டி என்னா அருந்தவர் அகன்று போனார்.

     (இ - ள்.) யாம் அவற்கு அடிமை அன்றோ - யாங்கள் கௌசிக
முனிவனுடைய அடிமயன்றோ, எம் வயின் சீற்றம் என்னோ - எம்
மிடத்தில் அவருக்கு ஏற்பட்ட கோபம் என்ன, யாம் அவற்கு இழைத்த
தீங்கு உண்டு என்னினும் - யாங்கள் அவனுக்குச் செய்த தீமை ஏதேனும்
இருப்பினும், திருத்தி - அவன் மனத்தை மாற்றி மகிமும்படி செய்து,
போமதே கருமம் என்னா - போவதே நற்செயல் என்று, புரவலன்
புகலக் கேட்டு - அரசன் கூறுவதைக் கேட்டு, ஈண்டு ஆமதே காண்டி
என்னா - இங்கு விளையப்போவதை நீ அறிந்துகொள் என்று கூறி,
அருந்தவர் அகன்று போனார் - அரிய தவத்தையுடைய முனிவர்
விலகிச் சென்றனர்.

     அரசன் "நாங்கள் கோசிக முனிவற்கு அடிமையல்லாவோ? அவன்
சினப்பதற்குக் காரணமில்லை, குற்றமிருப்பினும் பொறுக்குமாறு
வேண்டிக்கொள்வேன்" என்றான், முனிவர்களும் சென்றார்கள்.
                                                    (86)

 

607.	மாதவர் அகன்ற பின்னர் மாலைஅம் படாத்துள் நீங்கிப் பூதலம் என்னும் மங்கை புதைஇருள் படாத்துட் புக்காள் மேதகு தவத்தின் மிக்கோன் வினைப்பாடம் புகுது முன்னம் தீதறு குணத்தின் மிக்கோன் சித்திரப் படாத்துட் புக்கான்.

     (இ - ள்.) மாதவர் அகன்ற பின்னர் - சிறந்த தவமுனிவர்
சென்ற பிறகு, பூதலம் என்னும் மங்கை மாலை அம் படாத்துள் நீங்கி -
பூமி தேவி என்னும் பெண் மாலைக்காலமாகிய போர்வையினின்றும்
நீங்கி, புதை இருள் படாத்துள் புக்காள் - மூடுகின்ற இருள் என்னும்
போர்வைக்குள் புகுந்தாள், மேதகு தவத்தின் மிக்கோன் வினைப்பாடம்
புகுதும் முன்னம் - மேன்மையுடைய தவத்திற் சிறந்த விசுவாமித்திர
முனிவன் தீவினையாகிய போர்வைக்குள் புகுவதற்கு முன்னால், தீது அறு
குணத்தின் மிக்கோன் சித்திரப்பாடத்துள் புக்கான் - குற்றமில்லாத
நற்குணங்களையுடைய அரிச்சந்திரன் ஓவியத்திறம் மிக்க போர்வையால்
மூடப்பெற்ற கூடாரத்துக்குள் புகுந்தான்.