(இ - ள்.) அருவினை விளைத்தது எல்லாம் கௌசிகன் - காட்டு
விலங்குகளை ஏவிவிட்டு நமக்குக் கொடிய செயல்களை உண்டாக்கியது
எல்லாம் கௌசிகனே ஆவான், அவனால் இன்னம் வருவினை மிகவும்
உண்டு - அவனால் இன்னும் வரக்கூடிய தீமைகள் மிகுதியாக உண்டு
வளநகர் நாடு இழந்து - வளமான நகரத்தையும் நாட்டையும் இழந்து,
திருவினை இழந்து - செல்வங்களை இழந்து, சேயும் செல்வியும் வேறு
வேறாய் - குழந்தையும் சந்திரமதியும் வேறு வேறாகும்படி, பெருவினை
முடிப்பான் - (முனிவன்) பெரிய தீவினைகளைச் செய்வான் பின்னை
யாம் வெல்வோம் என்றான் - பின்னர் யாமே வெற்றி பெறுவோம்
என்று அமைச்சன் கூறினான்.

     'விசுவாமித்திரனால் இன்னும் பல தீமை விளையும் ஆயினும்
பின்னர் நாம் வெற்றி பெறுவோம்' என்று கனவினிகழ்ச்சிக்குப் பயன்
கூறினன் என்க.
                                                    (96)

 

	நீதி முறையே மன்னனைக் காக்கும்
617.	அனையவை அமைச்சன் கூற அரசனை அரிவை போற்றி எனைஇழந் தாலும் மன்னா வென்வயிற் றுதித்த மைந்தன் றனைஇழந் தாலும் இந்தத் தலம்இழந் தாலும் வெம்போர் முனைஇழந் தாலும் நீதி முறைஒன்று மிழவேல் என்றாள்.

     (இ - ள்.) அமைச்சன் அனையவை கூற - அமைச்சனாகிய
சத்தியகீர்த்தி மேற்கண்டவாறு கூறியவுடன், அரிவை அரசனை போற்றி
- சந்திரவதி மன்னனை வணங்கி, மன்னா எனை இழந்தாலும் -
மன்னனே! என்னை நீ இழக்கும் நிலை வந்தாலும், என் வயிற்று உதித்த
மைந்தன்தனை இழந்தாலும் - என் வயிற்றிற் பிறந்த மைந்தனை இழக்கும்
நிலை வந்தாலும், இந்தத் தலம் இழந்தாலும் - இந்த நாட்டை இழந்தாலும்,
வெம் போர் முனை இழந்தாலும் - போர் முனையிலே வெற்றி பெறும்
நிலையை இழந்தாலும், நிதி முறை ஒன்றும் இழவேல் என்றாள் -
நீதிமுறைமை மட்டும் இழக்காமல் காப்பாயாக என்றான்.

     நீதிமுறையே மன்னனைக் காக்கும் ஆதலின் சந்திரவதி அதனை
வலியுறுத்திக் கூறினாள்.
     "இறைகாக்கும் வையகம் எல்லாம் அவனை
     முறைகாக்கும் முட்டாச் செயின்"

என்னும் திருக்குறள் ஒப்பு நோக்கத்தக்கது.
                                                    (97)

 

	மன்னன் அமைச்சரைத் தேற்றுதல்
618.	என்றலும் அமைச்சர் எல்லாம் இருகண்நீர் அருவி பாய நின்றுநின் றழுது வாடி நெட்டுயிர்ப் புற்ற காலை மன்றலம் தெரியன் மார்பன் வருந்தனீர் என்று தேற்றி அன்றவண் உறைந்தான் அப்பால் அடுத்தவா றெடுத்                                     துரைப்பாம்.