[கோசிகன் பல சூழ்வினைகளை அரிச்சந்திரனுக்குப் புரிந்த
                      பகுதியைக் கூறுவது.]

	அறுசீர்க்கழி நெடிலடி ஆசிரிய விருத்தம்
619.	வென்றிவேல் மன்னன் விட்ட வெங்கணை தைத்த வாயால் துன்றிய குருதி சோரக் சுழன்றுட றுடிது டித்துக் குன்றினைக் கடந்து சென்று கோசிகன் தன்பாற் போந்து பன்றியாய் வந்த மாயை பட்டபா டனைத்துஞ் சொல்லும்.

     (இ - ள்.) வென்றிமேல் மன்னன் விட்ட வெங்கணை தைத்து -
வெற்றி பொருந்திய வேலாயுதத்தையுடைய அரிச்சந்திர மன்னன்
செலுத்திய கொடிய அம்பு தைக்கப்பெற்று, வாயால் துன்றிய குருதி
சோர - மிகுந்த இரத்தம் வாயின்வழி ஒழுக, சுழன்று உடல் துடி
துடித்து - உடல் சுழன்று துடிதுடித்து வருந்தி, குன்றினைக் கடந்து
சென்று - தான் விழுந்த மலையைக் கடந்து அப்பாற்சென்று, கோசிகன்
தன்பால் போந்து - விசுவாமித்திர முனிவரிடம் சென்று, பன்றியாய் வந்த
மாயை - பன்றி வடிவத்தோடு வந்த அந்த மாயையானது, பட்ட பாடு
அனைத்தும் சொல்லும் - தான் பட்ட துன்பங்கள் எல்லாவற்றையும்
சொல்லத் தொடங்கியது.

     வென்றி - வெற்றி : மெலித்தல் விகாரம். முனிவன் தன் தவ
வலிமையால் மாயமாகப் படைத்த பன்றி ஆதலால் "பன்றியாய் வந்த
மாயை" என்றார். அரசன் விட்ட அம்புபட்டு வாயிற் குருதி வடிய வந்த
பன்றி தான் பட்டபாட்டைக் கூறத் தொடங்கியது.
                                                     (1)

 

620.	என்னையா ளுடையாய் உன்றன் ஏவலின் படியான் ஏகி மன்னரும் கரியும் மாவும் சேனையும் மாளக் கொன்றேன் பின்னவன் விட்ட அம்பால் சுழன்றியான் பிழைத்துப் போந்தேன் உன்னரு ளுடையேற் கல்லால் உய்வுண்டோ என்ற தன்றே.

     (இ - ள்.) என்னை ஆளுடையாய் - என்னை
அடிமையாகக்கொண்ட முனிவனே!, உன் தன் ஏவலின்படி யான் ஏகி
- யான் உன்னுடைய கட்டளையின்படி சென்று, மன்னரும் கரியும்
மாவும் சேனையும் மாளக் கொன்றேன் - மன்னர்களையும்
யானைகளையும் குதிரைகளையும் மற்றும் உள்ள சேனைகளையும்
அழியும்படிகொன்றேன், பின் அவன் விட்ட அம்பால் சுழன்று யான்
பிழைத்துப் போந்தேன் - பின்னர் அரிச்சந்திர மன்னன் செலுத்திய
அம்பினால் உடல் சுழன்று யான் தப்பிப்பிழைத்து இங்கு வந்தேன்,
உன் அருள் உடையேற்கல்லால் உய்வுண்டோ என்றது - உன்னுடைய
அருளைப்பெற்ற என்னால் அன்றி மற்றவரால் தப்பிப்பிழைக்க
முடியுமோ என்றது.