637.	யாணர்க்குள் யாண நின்னை எய்துதற் கிழைத்த வேதா வீணர்க்குள் வீணன் எம்மை விதித்த அன்றிந்தி ரர்க்கும் வாணர்க்கும் அனந்த னார்க்கும் வாய்த்த வாறேபோல                                       நின்னைக் காணற்குத் தொழற்கு வாழ்த்தக் கண்கைநாப் படைத்தி லானே.

     (இ - ள்.) யாணர்க்குள் யாண - அழகர்க்குள் அழகனே,
நின்னை எய்துதற் கிழைத்த வேதா - உன்னைச் சேர்வதற்கு எங்களைப்
படைத்த நான்முகன், வீணர்க்குள் வீணன் - பயனற்ற செயல்
செய்பவர்களிற் சிறந்தவன் (ஏனெனில்), எம்மை விதித்த அன்று -
எம்மைப் படைத்த அந்நாளில், இந்திரற்கும் வாணர்க்கும்
அனந்தனார்க்கும் வாய்த்த வாறே போல் - இந்திரனுக்கு ஆயிரம்
கண்களும் வாணாசுரனுக்கு ஆயிரம் கைகளும், ஆதிசேடன் என்னும்
பாம்புக்கு ஆயிரம் தலைகளும் வாய்க்கும்படி செய்ததுபோல, நின்னைக்
காணற்கு தொழற்கு வாழ்த்த கண் கை நா படைத்திலானே - நின்னைக்
காண்பதற்கும் வணங்குதற்கும் வாழ்த்துதற்கும் ஆயிரக்கணக்கான
கண்களையும் கைகளையும் நாவுகளையும் படைக்காமல் இருந்துவிட்டானே.

     யாண் - அழகு; யாண் + அன் - யாணன்; இது ஈறு குறைந்து
விளியாயிற்று. நின்னை எய்துதற்கு என உரிமை பாராட்டிக் கூறியது
மகளிர் சொல்வன்மையைக் காட்டுகிறது. 'காணற்கு, தொழற்கு, வாழ்த்த :
முறையே கண், கை, நா படைத்திலானே' என்பது முறை நிரல்நிறை
அணி எனப்படும்.
                                                    (19)

 

638.	வையம்நின் நகரி செம்பொன் வடகிரி நினது பீடம் வெய்யவன் நினது தீபம் வேலைமஞ் சனநீர்ச் சாலை செய்யவள் நினது பாரி திங்கள்நின் கவிகை செவ்வேல் ஐயநின் பெருமை எம்மால் அளவிடற் கரிதே என்றார்.

     (இ - ள்.) வையம் நின் நகரி - இந்த மண்ணுலகம் உன்
நகரமாகும், செம்பொன் வடகிரி நினது பீடம் - செம்பொன் மலையாகிய
மேருமலை உன் அரியணையாகும், வெய்யவன் நினது தீபம் - கதிரவன்
உனது விளக்காவான், வேலை மஞ்சன நீர்ச்சாலை - கடல் நீ குளிக்கும்
நீர் நிரைந்துள்ள இடமாகும், செய்யவள் நினது பாரி - திருமகள் உன்
மனைவியாவாள், திங்கள் நின் கவிகை - மதியமே உன்
வெண்குடையாகும், செவ்வேல் ஐய நின் பெருமை எம்மால் அளவிடற்கு
அரிதே என்றார் - செம்மையான வேலைக் கையில் கொண்ட மன்னனே
! உன்னுடைய பெருமை எங்களால் அளவிட்டுக் கூற முடியாதது என்று
புகழ்ந்தனர் (மகளிர் இருவரும்).

     உயர்வு நவிற்சியாக மகளிர் மன்னனுடைய பெருமைகளைக்
கூறினர். திருவுடை மன்னரைத் திருமால் எனக் கூறுதல் வழக்கு
ஆதலின் திருமகளை மன்னன் மனைவியாகக் கூறினர்.
                                                    (20)

 

639.	சொல்லிய மாற்றம் கேளாத் தோன்றலும் வியந்து நோக்கி வல்லிநீர் யாரே தூர்தான் வந்தவா றேதீண் டென்றான் அல்லியம் தொடையன் மார்ப இவ்வனத் தகத்து வாழ்வோம் புல்லிய சாதி ஈனப் புலைச்சியர் யாங்கள் ஐயா.