(இ - ள்.) தோன்றலும் - மன்னனும், சொல்லிய மாற்றம் கேளா
வியந்து நோக்கி - மகளிர் இருவரும் கூறிய மொழிகளைக் கேட்டு
வியந்து பார்த்து, வல்லி நீர் யார் - பெண்களே ! நீங்கள் யார்?, ஏது
ஊர் - உங்கள் ஊர் எது?, ஈண்டு தான் வந்தவாறு ஏது என்றான் -
இவ்விடத்துக்கு நீங்கள் வந்த நோக்கம் யாது என்று கேட்டான், அல்லி
அம் தொடையல் மார்ப - (அப்போது அம்மகளிர்)
அகவிதழ்களையுடைய மலர்மாலை அணிந்த மார்பினையுடைய
மன்னனே, இவ்வனத்து அகத்து வாழ்வோம் - நாங்கள் இக்
காட்டின்கண் வாழ்பவர், புல்லிய சாதி ஈனப் புலைச்சியர் யாங்கள்
ஐயா - ஐயனே ! யாங்கள் தாழ்ந்த சாதியாகிய புலையர் குலத்திலே
பிறந்தவர்கள் ஐயா (என்று கூறினர்).

     கேளா : (கேட்டு) செய்யா என்னும் வாய்பாட்டு வினையெச்சம்.
தோன்றல் - ஆண்மையிற் சிறந்தவன். கலங்கா உள்ளம் படைத்த
மன்னன் ஆதலின் 'தோன்றல்' என்றார். மார்ப! ஐயா! இவ்விரண்டும்
விளி.
                                                    (21)

 

640.	வேதமா முனிவன் வைகு மேதகு சாரல் நின்றுன் பாதமே பணிந்து நோக்கும் அருத்தியில் பதறி வந்தோம் போதமும் வெறியும் இல்லாப் புல்லியேம் நல்லி யாழும் கீதமும் சிறிது வல்லேம் கேளெனாக் கிளத்திப் பின்னர்.

     (இ - ள்.) வேதமா முனிவன் வைகும் மேதகு சாரல் நின்று -
வேதங்களைக் கற்ற விசுவாமித்திர முனிவன் தங்கியுள்ள மேன்மையான
இடத்திலிருந்து, உன் பாதமே பணிந்து நோக்கும் அருத்தியின் - உன்
பாதங்களை வணங்கி உன்னைப் பார்க்கவேண்டுமென்கிற விருப்பத்தோடு,
பதறி வந்தோம் - விரைந்து வந்தோம், போதமும் நெறியும் இல்லாப்
புல்லியேம் - ஞானமும் அதற்கேற்ற பழக்கமான முறைகளும் இல்லாத
கீழ்மக்கள் யாம், நல் யாழும் கீதமும் சிறிது வல்லேம் - நல்ல யாழ்
இசைப்பதிலும் இன்னிசை பாடுவதிலும் சிறிது வல்லமை யுடையோம்,
கேள் எனாக் கிளத்திப் பின்னும் - நீ கேட்பாயாக என்று சொல்லி
மேலும்;

     இச் செய்யும் குளகம். ஞானம் உடையவர் அதனை மேலும்
வளர்க்க நாள்தோறும் கொள்ளும் நெறிமுறைகள் உண்டு ஆதலால்
"போதமும் நெறியும் இல்லாப் புல்லியேம்" என்றார். நல் + யாழ் =
நல்லியாழ். வந்தோம், புல்லியேம், வல்லேம் என்பன தன்மைப் பன்மை
வினைமுற்றுக்கள். எனா - என்று, கிளத்தி - சொல்லி; கிளத்தி என்ற
எச்சம் அடுத்த கவியிலுள்ள "வாங்கி" "முறுக்கி" முதலிய எச்சங்களைக்
கொண்டு பாடினார் என்ற வினைமுற்றைக்கொண்டு முடியும்.
                                                    (22)

 

641.	மகரயாழ் வாங்கி நீங்கும் மாடக முறுக்கிச் செம்பொற் சிகரமா முலையில் சேர்த்திச் செவியுற இசைஎ ழீஇத்தம் நிகரிலா அமுதப் பாடற் பாணியி னிறுவிப் பின்னர் பகர்தரும் இசைகள் ஏழும் வகைவகை பாடி னாரே.