(இ - ள்.) மா முனி தேரில் ஏறிச் செல - சிறந்த முனிவனாகிய
கௌசிகன் தேரில் ஏறிச் சென்றபோது, சேனை பின் செல்ல - சேனை
பின் தொடர்ந்து செல்ல, போரில் வீரனும் தேவியும் புதல்வனும் - போர்
செய்வதில் வீரனாகிய அரிச்சந்திரனும் அவன் மனைவி சந்திரமதியும்
மைந்தனாகிய தேவதாசனும், நடுவே அடி பொறாது உடல் பதைபதைக்கப்
பாரின்மேல் நடந்து - அச்சேனையின் நடுவே கால்கள் வலி
பொறுக்காமல் உடம்பு பதைபதைக்கப் பூமியின்மேல் நடந்து, வேரி வாவி
விட்டு அயோத்தியை நோக்கியே விரைந்தார் - தேன் சிந்துகின்ற
குளத்தினைவிட்டு நீங்கி அயோத்தியை நோக்கிச் சென்றனர்.

     வேரி - மணம். மணம் பொருந்திய வாவி என்க. பூமியில்
வெப்பத்தைப் பொறுக்காமல் கால் சுடும்போது உடல் நடுங்கும் ஆதலால்
'அடி பொறாது உடல் பதைபதைக்க' என்றார். பதைபதைக்க என்பது
இரட்டைக்கிளவி.
                                                    (111)

 

730.	கன்ன லம்பெருங் கழனியும் சோலையும் கடந்து வன்ன மாமணிப் புரிசையின் புறத்துவந் தணைந்தார் நன்ன கர்ப்பெருஞ் சனமெலாம் எதிர்கொடு நண்ணி மன்ன னைச்செழுந் தேர்மிசைக் கண்டிலர் மருண்டார்.

     (இ - ள்.) கன்னல் அம் பெருங் கழனியும் சோலையும் கடந்து
- கரும்பு விளைகின்ற அழகிய பெரிய வயல்களையும் சோலைகளையும்
கடந்து, வன்ன மா மணிப் புரிசையின் புறத்து வந்து அணைந்தார் -
அழகிய மணிகளால் இழைக்கப்பெற்ற நகர மதிலின் வெளியில் வந்து
சேர்ந்தனர், நன்னகர்ப் பெருஞ் சனமெலாம் எதிர் கொடு நண்ணி - நல்ல
நகரத்தில் உள்ள மக்கள் எல்லோரும் எதிர்கொண்டு வந்து, மன்னனைச்
செழுந் தேர் மிசை கண்டிலர் மருண்டார் - மன்னனைச் செழுமையான
தேரின்மேல் காணதவர்களாய் மயங்கினர்.

     மன்னவன் வேட்டைக்குச் சென்றவன் தேர்மேல் வருவான் என்று
அயோத்திநகர்க் குடிகள் எதிர்நோக்கினர். தேர்மேல் மன்னனைக்
கண்டிலர் திகைத்தனர் என்க. கண்டிலர் என்பது எச்சப் பொருள் தந்தது.
                                                    (112)

 

731.	இரத மேன்முனி ஏறிய தகிதமோ இதமோ சரத மோஎனு மையத்தார் வந்தவண் சார்ந்தார் விரதம் இவ்வகை விளைந்தவா றேதென மெலிந்து கரத லங்களான் முகத்தறைந் தழுதனர் கதறி.