759.	முல்லைமுகை நகையாளும் முடிவேந்த னும்மகனும்    முழுதும் போன எல்லைஎலா மணஅறையும் மலரணையும் உண்டோஎன்    றிரங்கி வீழ்வார் தொல்லைவிதிப் பயனாலே வந்திரந்த மாமுனிவன்    சொன்ன வெல்லாம் இல்லைஎனா தீந்தோருக் கித்தனையோ பெரும்பேறென்    றேங்கி வீழ்வார்.

     (இ - ள்.) முல்லை முகை நகையாளும் முடி வேந்தனும் மகனும்
- முல்லை அரும்புபோன்ற பல் வரிசையுடைய அரசியும் முடி மன்னனும்
மகனாகிய தேவதாசனும், முழுதும் போன எல்லை யெலாம் - முழுவதும்
சென்ற இடங்களில் எல்லாம், மண அறையும் மலர் அணையும் உண்டோ
என்று இரங்கி வீழ்வார் - படுக்கும் அறையும் மலர்ப் படுக்கையும்
உண்டோ என்று இரக்கங்கொண்டு வருந்திக் கீழே விழுவார்கள்,
தொல்லை விதிப் பயனாலே - பழைய விதியின் பயனால், வந்து இரந்த
மா முனிவன் சொன்ன வெல்லாம் - வந்து இரந்து கேட்ட பெரிய
முனிவன் சொன்னவற்றை யெல்லாம், இல்லை எனாது ஈந்தோருக்கு -
இல்லை என்று கூறாது கொடுத்தோருக்கு, இத்தனையோ பெரும் பேறு
என்று ஏங்கி வீழ்வார் - இவ்வளவோ அடைதற்குரிய பெரிய மேன்மை
என்று வருந்தி விழுவார்கள்.

     இல்லை யென்னாமல் வழங்கிய வள்ளல்களுக்குப் பெருமையும்
செல்வமும் பெருகும் என்று முன்னோர்கள் சொன்னார்களே, என்ன
பெருமை கிடைத்துளது? ஒன்றுமில்லாது செல்லும்படி நேர்ந்ததே எனவும்
கூறினன்.
                                                     (7)

 

760.	வல்லார்க்கும் மாட்டார்க்கும் மறமேநன் றென்றுரைப்பார்    மறநன் றாமோ அல்லார்க்கும் குழன்மடவீ ரறமேநன் றென்றுரைப்பா    ரதுநன் றாகின் நல்லார்க்கும் தீயார்க்கும் எல்லார்க்கும் ஒருமையினா    னடவா தென்னே எல்லார்க்கும் உளதாகில் எங்கோனுக் கிலையான    தென்னோ என்பார்.

     (இ - ள்.) வல்லார்க்கும் மாட்டார்க்கும் மறமே நன்றென்று
உரைப்பார் - செய்ய வல்லமையுடையவர்க்கும் வல்லமை இல்லாதவர்க்கும்
வீரமே நன்று என்று சொல்வர், மறம் நன்று ஆமோ - வீரம் நன்மை
விளைக்குமோ, அல் ஆர்க்கும் குழல் மடவீர் - இருளை நிறைக்கும்
கருங்கூந்தலையுடைய பெண்களே, அறமே நன்று என்று உரைப்பார் அது
நன்று ஆகில் - அறமே நல்லது என்று சொல்லுவார்கள் அது நல்லது
ஆகுமானால், நல்லார்க்கும் தீயார்க்கும் எல்லார்க்கும் ஒருமையினால்
நடவாது என்னே - நல்லவர்களுக்கும் கெட்டவர்களுக்கும் எல்லோருக்கும்
பொதுவாக ஒரே