செவ்வழ லயிற்படைச் செல்வ கேளெனா வெவ்வழ லனையநீர் வெள்ளி கூறுவான்.

     (இ - ள்.) அ அழல் வளைந்திட அரசர் கோமகன் - அந்த
நெருப்பு வளைந்துகொண்டபோது மன்னர் மன்னனாகிய அரிச்சந்திரன்,
இ அழல் எவ் வழல் என்று கூறலும் - இந்த நெருப்பு எவ்வகையில் வந்த
நெருப்பு என்று கேட்டவுடன், செவ் வழல் அயிற் படைச் செல்வகேள்
எனா - சிவந்த அழல் போன்ற கூர்மையான படைகளையுடைய செல்வனே
கேட்பாயாக என்று, வெவ் வழல் அனைய நீர் வெள்ளி கூறுவான் -
கொடிய நெருப்புப்போன்ற தன்மையுடைய வெள்ளி என்பவன் கூறத்
தொடங்கினான்.

     நீர் - நீர்மை, தன்மை, குணம் : ஒருபொருட்சொற்கள். அயில் படை
- அயிலாகிய படை : இருபெயரொட்டுப் பண்புத்தொகை.

     தீ தம்மைச் சுற்றி வளைத்தபோது மன்னன் வெள்ளியை நோக்கி
இஃது எவ்வகையில் வந்த தீ என்று வினவினன். அவன் விடை கூறுவான்.
                                                   (141)

 

894.	சண்டவெம் பசியினா லழன்று தாவியே அண்டகோ ளத்தினை அடர்ந்த செந்தழல் மண்டலத் தரசர்தம் மரபி லோருயிர் உண்டல தேகில தென்று ணர்த்தினான்.

       (இ - ள்.) சண்ட வெம் பசியினால் அழன்று தாவியே -
வேகமான கொடிய பசியினால் கொதித்துத் தாவி, அண்டகோளத்தினை
அடர்ந்த செந்தழல் - வானமண்டலத்தையும் நெருங்கிய செந்தழலானது,
மண்டலத்து அரசர்தம் மரபில் ஓர் உயிர் உண்டு அலது - இந்த
மண்ணுலகத்து மன்னருடைய மரபிற்பிறந்த ஒருவருடைய உயிரை
உண்டால் அல்லாமல், ஏகிலது என்று உணர்த்தினான் -
திரும்பிச்செல்லாது என்று கூறினான்.

     சுக்கிரன் மன்னனை நோக்கி 'இத் தீ மன்னர்குலத்தில் ஒருவரை
யுண்பதற்காக வந்த தீ; ஆதலால் ஒருவருயிர் உண்டுதான் ஒழியும்' என்று
கூறினான் என்பது.
                                                   (142)

 

	அரிச்சந்திரன் 'தீயில் வீழ்ந்து இறப்பேன்' எனல்
895.	ஒருவரை யாருயி ருண்டு போகில்யான் ஒருவனே இறப்பனீ ருய்ந்து போமெனாத் திருவையும் மகனையும் நோக்கிச் செங்கணீர் வரவர வனலெதிர் மன்னன் ஏகினான்.

     (இ - ள்.) ஒருவரை ஆருயிர் உண்டு போகில் - ஒருவரைமட்டும்
இந்நெருப்பு உயிர் குடித்துப்போவதாய் இருந்தால், யான் ஒருவனே
இறப்பன் - யான் ஒருவன் மட்டுமே இறந்து உயிர்விடுவேன், நீர் உய்ந்து
போம் எனா - நீங்கள் தப்பிப் பிழைத்துப் போய்விடுங்கள் என்று, திருவையும் மகனையும்